ភ្នំពេញៈ ក្រោយពីបានបើកសវនាការជាលើកទី២កាលពីរសៀលថ្ងៃទី៣ ខែតុលា ឆ្នាំ២០១៦កន្លងទៅ នៅព្រឹកថ្ងៃទី២៨ ខែវិច្ឆិកា ឆ្នាំ២០១៦ នេះលោក ជួន សុរាសី ប្រធានក្រុមប្រឹក្សាចៅក្រមជំនុំជម្រះសាលាដំបូងរាជធានីភ្នំពេញ បានប្រកាសសាលក្រមសម្រេចផ្តន្ទាទោសជនជាប់ចោទប្រុសស្រីចំនួន៣នាក់ដូចខាងក្រោម៖

១.ជនជាប់ចោទឈ្មោះ ទូច ឆាយ ហៅស៊ុង ភេទប្រុស អាយុ៣៤ឆ្នាំ ដាក់ពន្ធនាគារកំណត់រយៈពេល៨ឆ្នាំ និងពិន័យជាប្រាក់១៥លានរៀលចូលជាថវិការដ្ឋ។

២.ជនជាប់ចោទឈ្មោះ ឯក រដ្ឋា ភេទស្រី អាយុ២០ឆ្នាំ (រត់គេចខ្លួន) ដាក់ពន្ធនាគារកំណត់រយៈពេល៨ឆ្នាំពិន័យជាប្រាក់១៥លានរៀលចូលជាថវិការដ្ឋ និងចេញដីកាតាមចាប់ខ្លួនមកអនុវត្តទោសនៅក្នុងពន្ធនាគារ។

៣.ជនជាប់ចោទឈ្មោះ អ៊ិន អារីយ៉ា ភេទស្រី អាយុ២៥ឆ្នាំ ដាក់ពន្ធនាគារកំណត់រយៈពេល ១៤ឆ្នាំ និងពិន័យជាប្រាក់៣០លានរៀលចូលជាថវិការដ្ឋ។

ក្រោមបទចោទប្រកាន់ពីបទ ជួញដូរដោយខុសច្បាប់នូវសារធាតុជាតិប្រភេទ មេតំហ្វេតាមី ធាតុសុទ្ធចំនួន១៣៩.០២ក្រាម និង កេតាមីន ធាតុសុទ្ធចំនួន ០.០៥២ក្រាម ប្រព្រឹត្តកាលពីថ្ងៃទី១៨ ខែកញ្ញា ឆ្នាំ២០១៥ នៅចំណុចផ្ទះលេខ១៩ E0 ផ្លូវ២៣០ សង្កាត់បឹងសាឡាង ខណ្ឌទួលគោក រាជធានីភ្នំពេញ បទល្មើសដែលចែងឱ្យផ្តន្ទាទោសតាមមាត្រា៤០នៃច្បាប់ស្តីពី ការត្រួតពិនិត្យគ្រឿងញៀន។

ក្រោយសវនាការប្រកាសសាលក្រម ជនជាប់ចោទឈ្មោះ ទូច ឆាយ ហៅស៊ុង និងឈ្មោះ អ៊ិន អារីយ៉ា បានថ្លែងប្រាប់អ្នកសារព័ត៌មានថា ពួកគេនឹងប្តឹងឧទ្ធរណ៍ជំទាស់នឹងសាលក្រមរបស់សាលាដំបូងនៅព្រឹកនេះ។ ពួកគេបានបញ្ជាក់ថា ការដាក់ទោសនេះពិតជាធ្ងន់ធ្ងរចំពោះពួកគេ ខណៈដែលពួកគេមិនបានប្រព្រឹត្តដូចការចោទប្រកាន់របស់តុលាការឡើយ៕

https://youtu.be/giSpBEaYCJs