មណ្ឌលគិរីៈ តម្លៃដំឡូងមីស្រស់ បច្ចុប្បន្ន លក់ចេញគឺបាន តម្លៃ២១០រៀល ប៉ុណ្ណោះ បើធៀបនឹងឆ្នាំ មុនធ្លាក់ថ្លៃ ដូច្នេះតម្លៃនេះ មិនអាចធ្វើឲ្យពួកគេរកប្រាក់ចំណេញឃើញទេ។

ប្រជាកសិករជាអ្នកដាំដំឡូងមី រស់នៅភូមិអូរអាម ឃុំស្រែខ្ទុម ស្រុកកែវសីមា បានសម្ដែងក្ដីបារម្ភយ៉ាងខ្លាំងពីបញ្ហាហាង ឆេងតម្លៃដំឡូងមី នៅចុងខែវិច្ឆិកានេះ ដែលស្ថិតនៅក្នុងតម្លៃមួយទាបនៅឡើយ ដោយពួកគេ បានអះអាងថា ប្រសិនបើ តម្លៃទីផ្សារទទួលទិញដំឡូងមីទាបដូច្នេះ ពួកគេអាចប្រឈមនឹងការខាតបង់ ឫចំណេញក្នុងកម្រិតតិចតួចប៉ុណ្ណោះ ព្រោះ កសិករខ្លះ បានជួលដីពីគេសម្រាប់ដាំដំណាំនេះ ចំណែកខ្លះទៀត ចងការលុយពីធនាគារ ឫចងការប្រាក់ឯកជន យកមក ប្រកបរបរកសិកម្មមួយនេះ ។

កសិករ បានឲ្យដឹងទៀតថា សម្រាប់ការដាំ ដំណាំដំ ឡូងមីនេះ គឺត្រូវចំណាយដើមទុនច្រើនគួរសមដែរទៅលើការជួលដីគេ ការថែរទាំដោយយកចិត្តទុកដាក់ដើម្បីបានផលល្អ ។ ចំណែកក្នុងអំឡុងពេលប្រមូលផល មានមើមដំឡូង ខ្លះខូចមិនអាចលក់បាន បូករួម ទាំងត្រូវជួលកម្លាំងពលកម្មផង ដូច្នេះ បើតម្លៃដំឡូងមីស្រស់ ស្ថិតក្នុងតម្លៃ២១០រៀល គឺទទួលបានប្រាក់ចំណេញតិចតួចប៉ុណ្ណោះ បើធៀបនឹងឆ្នាំមុន គឺលក់ចេញក្នុងតម្លៃ២៧០ ទៅ២៨០ ឯណោះ។ តែប្រសិនបើទីផ្សារតម្លៃដំឡូងមីស្រស់ឡើងត្រឹម២៥០ទៅ២៦០រៀល ក្នុងមួយគីឡូក្រាម ទើបអាចទទួលបានផលចំណេញខ្លះ មិនប្រឈមជាមួយការខាតបង់ ។

ប្រជាកសិករ បានបន្ដថា សម្រាប់ការចំណាយទាំងអស់លើការបង្កបង្កើនផលដំណាំ ដំឡូងមី គឺប្រមាណ៣លាន៥សែនរៀល ទៅ៤លានរៀល ទាំងការចំណាយលើថ្លៃជី ថ្លៃពលកម្មផ្សេងៗទាំងអស់ក្នុងមួយហិកតា ។ ចំណែកទិន្នផលវិញអាចទទួលបានក្នុងមួយហិកតា ចន្លោះ ពី១២តោន ទៅ១៧តោន ដូច្នេះប្រសិនបើតម្លៃដំឡូងមី ស្រស់ស្ថិតក្នុងតម្លៃ២១០រៀល ក្នុងមួយគីឡូក្រាម កសិករអាចប្រឈមនឹងការខាតបង់ ។ ហើយលោកក៏ចង់ឲ្យតម្លៃដំឡូង មីស្រស់ឡើងដល់២៥០ទៅ២៦០រៀល ក្នុងមួយគីឡូក្រាម ។

ពាក់ព័ន្ធនឹងការត្អូញត្អែររបស់ប្រជាកសិករ លោក ប្រធានមន្ទីរកសិកម្ម ខេត្តមណ្ឌលគិរី សុង ឃាង បានបញ្ជាក់ ចំពោះទីផ្សារតម្លៃដំឡូងមី គឺ លោកមិនអាច សន្និដ្ឋានបានទេថា ដំឡូងមី នឹងអាចហក់ឡើងក្នុងតម្លៃខ្ពស់ជាងនេះ ឬយ៉ាងណានោះ ព្រោះហាងឆេងដំឡូងមី ពឹងផ្អែក ទៅលើទីផ្សារសកល មិនអាចកំណត់បាននោះទេ៕