ភ្នំពេញ: នគរបាលនាយកដ្ឋានស៊ើបអង្កេត និងអនុវត្តនីតិវិធីនៃអគ្គនាយកដ្ឋានអន្តោប្រវេសន៍ក្រសួងមហាផ្ទៃ បានដឹកនាំកម្លាំងជាច្រើននាក់ ចុះត្រួតពិនិត្យការស្នាក់នៅរបស់ជនបរទេសតាមបណ្តាហាងកាហ្វេនិងទីតាំងម៉ាស្សា ឃាត់ខ្លួនបានជនជាតិវៀតណាមខុសច្បាប់ចំនួន១៦នាក់ យកមកធ្វើការសាកសួរ។

ការចុះបង្ក្រាបនេះបានធ្វើឡើងកាលពីរសៀលថ្ងៃទី២៨ ខែវិច្ឆិកា ឆ្នាំ២០១៦ ស្ថិតនៅចំណុចតាមបណ្តាហាងកាហ្វេនិងទីតាំងម៉ាស្សា ស្ថិតក្នុងសង្កាត់បឹងកេងកងទី២ ខណ្ឌចម្ការមន។

ការបង្ក្រាបនេះដែរ ធ្វើឡើងដោយមានការដឹកនាំកម្លាំងដោយ លោកឧត្តមសេនីយ៍ទោ អ៊ុក ហៃសីឡា ប្រធាននាយកដ្ឋានស៊ើបអង្កេត និងអនុវត្តនីតិវិធីនៃអគ្គនាយកដ្ឋានអន្តោប្រវេសន៍ក្រសួងមហាផ្ទៃ សម្របសម្រួលដោយលោក ព្រះរាជអាជ្ញារងអមសាលាដំបូងរាជធានីភ្នំពេញ សហការជាមួយនឹងនគរបាលនៃស្នងការដ្ឋានរាជធានីភ្នំពេញ និងនគរបាលខណ្ឌចម្ការមន ។ ជាក់ស្តែងនៅក្នុងការបង្ក្រាបនេះដែរ សមត្ថកិច្ចធ្វើការឃាត់ខ្លួនបានជនជាតិវៀតណាមចំនួន១៦នាក់ ក្នុងនោះមានស្រីចំនួន១០នាក់ ក្រោយពីរកឃើញថា ជនបរទេសទាំង១៦នាក់ខាងលើនេះ បានលួចឆ្លងដែនចូលមកស្នាក់នៅនិងប្រកបការងារក្នុងប្រទេសកម្ពុជាដោយខុសច្បាប់ ។

បច្ចុប្បន្ន ជនបរទេសទាំង១៦នាក់ ត្រូវបានសមត្ថកិច្ចនាំខ្លួនមកកាន់ អគ្គនាយកដ្ឋានអន្តោប្រវេសន៍ក្រសួងមហាផ្ទៃ ដើម្បីត្រៀមបណ្តេញចេញនៅពេលក្រោយតាមនីតិវិធីច្បាប់៕