ស្វាយរៀង: សមត្ថកិច្ចនគបាលក្រុងបាវិត បានធ្វើការចាប់ឃាត់ខ្លួនជនសង្ស័យម្នាក់ពីបទចាប់បង្ខាំងមនុស្សជំរិតទារប្រាក់១០០លានដុង ដោយចោទថាជនរងគ្រោះជំពាក់ប្រាក់ខ្លួន១០០លានដុង យកទៅលេងល្បែងក្នុងកាស៊ីណូនៅក្រុងបាវិត ពេលចាញ់ល្បែងអស់មិនព្រមសងប្រាក់ ទើបចាប់បង្ខាំងដើម្បីឲ្យឪពុកម្តាយយកប្រាក់មកសងទើបដោះលែងវិញ តែក៏ត្រូវសមត្ថកិច្ចចាប់ខ្លួនបាន បញ្ជូនមកកាន់ស្នងការដ្ឋាននគបាលខេត្តចាត់ការតាមនីតិវិធីនិងបញ្ជូនទៅសាលាដំបូងខេត្តចាត់ការបន្ត កាលពីវេលាម៉ោង២រសៀល ថ្ងៃទី២៨ ខែវិច្ឆិកា ឆ្នាំ២០១៦ ។

បើតាមសមត្ថកិច្ចបានឲ្យដឹងថា ជនសង្ស័យឈ្មោះ ហា វ៉ាំងថាយ ភេទប្រុស អាយុ២៣ឆ្នាំ ជាជនជាតិវៀតណាម មានទីលំនៅភូមិមណ្ឌល២ សង្កាត់អីចឹង ស្រុកកងទុង ខេត្តយ៉ាឡាយ ប្រទេសវៀតណាម។

ប្រភពដដែលបន្តទៀតថា ករណីចាប់មនុស្សជំរិតទារប្រាក់នេះកើតឡើងនៅថ្ងៃទី២៦ ខែវិច្ឆិកា ឆ្នាំ២០១៦ វេលាម៉ោង៦និង៣០នាទី ហើយនគបាលប៉ុស្តិ៍រដ្ឋបាលសង្កាត់បាវិត បានទទួលពាក្យបណ្ដឹងមួយច្បាប់ ពីឈ្មោះ ង្វៀង ធីវ៉ាង ភេទស្រី អាយុ២៦ឆ្នាំ ជនជាតិវៀតណាម មានទីលំនៅភូមិថាន់ហា ឃុំកូយ៉ូវស្រុកកូយ៉ូវខេត្តតៃនិញ បានប្ដឹងទៅលើឈ្មោះ ហា វ៉ាំងថាយ និងបក្ខពួក២នាក់ទៀត ពីបទបង្ខាំងមនុស្សខុសច្បាប់ ដែលជនរងគ្រោះឈ្មោះ ង្វៀង មិនជី ភេទប្រុស អាយុ២៣ឆ្នាំមានទីលំនៅភូមិថាន់ហា ឃុំកូយ៉ូវ ស្រុកកូយ៉ូវ ខេត្តតៃនិញ ប្រទេសវៀតណាម។ក្រោយពីទទួលបណ្ដឹងរួចមកសមត្ថកិច្ចយើងបានចុះស្រាវជ្រាវរហូតដល់ម៉ោង៧និង៣០នាទីយប់ទើបសមត្ថកិច្ចយើងបានចាប់ឃាត់ខ្លួនជនសង្ស័យបានម្នាក់ឈ្មោះ ហា វ៉ាំងថាយ។

នៅចំពោះមុខសមត្ថកិច្ចជនសង្ស័យបានសារភាពថា ខ្លួនជាអ្នកស៊ីឈ្នួលយាមមនុស្សឲ្យរ៉ូលិញ (អ្នករកម៉ូយឲ្យកាស៊ីណូក្រុងបាវិត) ឈ្មោះ ហ្វា ភេទប្រុសអាយុប្រហែល៣០ឆ្នាំ ជាជនជាតិវៀតណាម។ ហើយកាលពីថ្ងៃទី២៣ខែវិច្ឆិកា ឆ្នាំ២០១៦ ខ្លួនបានយាមមនុស្សម្នាក់ឈ្មោះ ង្វៀង មិនជី ភេទប្រុស អាយុ២៣ឆ្នាំ ជនជាតិវៀតណាម នៅបន្ទប់លេខ៤ ផ្ទះជួលរបស់ ឈ្មោះ ទេព ធីតា ភេទស្រី អាយុ៥១ឆ្នាំ នៅភូមិបាវិតកណ្ដាល សង្កាត់បាវិត ក្រុងបាវិត ខេត្តស្វាយរៀង ។ នៅថ្ងៃទី២៦ខែវិច្ឆិកា ឆ្នាំ២០១៦ វេលាម៉ោង៥ និង១៥ នាទី ល្ងាច មានឈ្មោះ ថាំង ភេទប្រុស ជនជាតិវៀតណាម ជាមេរ៉ូលីញ បានយកឈ្មោះ ង្វៀង មិនជី ចេញពីបន្ទប់ដាក់ក្នុងរថយន្ដដឹកចេញទៅក្រៅ ។លុះដល់ម៉ោង៧ និង៣០នាទី យប់ឈ្មោះ ថាំង បានទូរសព្ទមកបា្រប់ខ្លួនឲ្យទៅទទួលប្រាក់ពីក្រុមគ្រួសារបស់ឈ្មោះ ង្វៀង មិនជី នៅមុខកាស៊ីណូកាឡាក់ស៊ីចំនួន ១០០លានដុង ពេលខ្លួនមកដល់មុខកាស៊ីណូកាឡាក់ស៊ីក៏មានមនុស្សកំពុងឈរចាំនៅទីនោះខ្លួនក៏ជិះម៉ូតូចូលទៅហើយក៏ត្រូវសមត្ថកិច្ចចាប់ឃាត់ខ្លួនយកមកប៉ុស្តិ៍នគបាលសង្កាត់រដ្ឋបាលបាវិតដើម្បីសាកសួរតែម្ដង។

បន្ទាប់ពីសាកសួរបានប្រហែល៣០នាទីស្រាប់តែឃើញជនរងគ្រោះឈ្មោះ ង្វៀងមិនជី ដើរមកដល់ប៉ុស្ដិ៍រដ្ឋបាលដោយខ្លួនឯង។ ក្រោយពីរសាកសួររួចមកជនសង្ស័យត្រូវឃាត់ខ្លួនបញ្ជូនទៅអធិការដ្ឋាននគរបាលក្រុងបាវិត ដើម្បីកសាងសំណុំរឿងបញ្ជូនទៅការិយាល័យនគបាលព្រហ្មទណ្ឌកម្រិតធ្ងន់ស្នងការដ្ឋាននគបាលខេត្តដើម្បីកសាងសំណុំរឿងបន្តបញ្ជូនខ្លួនជនសង្ស័យទៅសាលាដំបូងខេត្តស្វាយរៀងចាត់ការតាមនីតិវិធីច្បាប់៕