កណ្តាល: គ្រោះថ្នាក់ចរាចរណ៍មួយបង្កឡើងដោយរថយន្តម៉ាក BAW បើកបរដោយបុរសម្នាក់ខ្វះការប្រុងប្រយត្ន័ក្នុងល្បឿនលឿន ជ្រុលចង្កូតទៅបុកមនុស្ស២នាក់ ដែលកំពុងដើរឆ្លងផ្លូវយ៉ាងពេញទំហឹង បណ្តាលឲ្យម្នាក់ស្លាប់ និងម្នាក់ទៀតរងរបួសស្រាល។ ហេតុការណ៍នេះបានកើតឡើងកាលពីវេលាម៉ោង៦និង៥នាទី ថ្ងៃទី២៨ ខែវិច្ឆិកា ឆ្នាំ២០១៦ ស្ថិតនៅចំណុចចន្លោះគីឡូម៉ែត្រលេខ២០-២១ ផ្លូវជាតិលេខ៤ ក្នុងភូមិបុរីកម្មករ ឃុំបែកចាន ស្រុកអង្គស្នួល ខេតកណ្ដាល។

ជនរងគ្រោះទាំង២នាក់ ទី១មានឈ្មោះ ដួង ចន្ទ្រា ភេទស្រី អាយុ២៧ឆ្នាំ មុខរបរកម្មករតេយ៉ុង ស្នាក់នៅភូមិត្រពាំងក្រសាំង ឃុំបែកចាន ស្រុកអង្គស្នួល ខេត្តកណ្តាល រងរបួសស្រាល។ និងម្នាក់ទៀតឈ្មោះ ដួង ម៉ៅ ភេទស្រី អាយុ៣២ឆ្នាំ ស្នាក់នៅជាមួយគ្នា មុខរបរកម្មករ ស្លាប់ក្រោយពីបញ្ជូនទៅដល់មន្ទីរពេទ្យ។

ប្រភពព័ត៌មានបានឲ្យដឹងថា មុនពេលកើតហេតុគេឃើញមានរថយន្តមួយគ្រឿងម៉ាក BAW ចិន ពណ៌ខៀវ ពាក់ស្លាកលេខ ភ្នំពេញ 3B-3731បើកបរដោយបុរសម្នាក់ក្នុងទិសដៅពីកើតទៅលិច (ភ្នំពេញ-ព្រះសីហនុ) លុះដល់ចំណុចខាងលើបានទៅបុកមនុស្ស២នាក់ ដែលកំពុងដើរឆ្លងថ្នល់ ពីជើងទៅត្បូង យ៉ាងពេញទំហឹងបណ្តាលឲ្យស្ត្រីម្នាក់រងរបួសស្រាល និងម្នាក់ទៀតរងរបួសធ្ងន់ស្លាប់ក្រោយពីបញ្ជូនទៅសង្គ្រោះបន្ទាន់នៅមន្ទីរពេទ្យ។ ចំណែកអ្នកបើកបររថយន្តបង្ក បានឈប់រថយន្តចុះរត់គេចខ្លួនបាត់ស្រមោល បន្សល់ទុករថយន្តបង្កនៅនឹងកន្លែងកើតហេតុ។

ក្រោយពីកើតហេតុសមត្ថកិច្ចបានចុះមកធ្វើការវាស់វែងនិងបាននាំយករថយន្តបង្កខាងលើយកទៅរក្សាទុកដើម្បីរង់ចាំធ្វើការដោះស្រាយគ្នាតាមផ្លូវច្បាប់ចំណែកសាកសពជនរងគ្រោះ ត្រូវបានសមត្ថកិច្ចប្រគល់ទៅឲ្យក្រុមគ្រួសារធ្វើបុណ្យតាមប្រពៃណី ៕