ភ្នំពេញ: បុរសម្នាក់ជិះម៉ូតូ ទៅរកទិញថ្នាំញៀននៅតាមបណ្តោយផ្លូវរថភ្លើងជិតនិងផ្លូវលេខ៧០ ត្រូវក្រុមចោរដែលជាក្រុមញៀនថ្នាំ យកដំបងវាយប្លន់យកម៉ូតូម៉ាកស្កុបពីទៅបាត់ ដែលហេតុការណ៍នេះបានកើតឡើងកាលពីវេលាម៉ោង១១និង១០នាទី យប់ថ្ងៃទី២៩ ខែវិច្ឆិកា ឆ្នាំ២០១៦ ស្ថិតក្នុងសង្កាត់ស្រះចក ខណ្ឌដូនពេញ រាជធានីភ្នំពេញ។

ប្រភពពីជនរងគ្រោះ បានឲ្យដឹងថា មុនកើតហេតុខ្លួនបានជិះម៉ូតូមូយគ្រឿងម៉ាកស្កុបពី ពណ៌សលាយខៀវ ពាក់ស្លាកលេខ ភ្នំពេញ 1BU-4496 ចេញពីផ្ទះនៅម្តុំផ្សារសិនជូរី ក្នុងគោលបំណងទៅផ្ទះបងនៅឯព្រែកព្នៅ។ជនរងគ្រោះបន្ថែមថាមុននឹងទៅ កុំឲ្យខាតជើងក៏ឆ្លៀតចូលទៅទិញថ្នាំញៀនសិន តែមិនទាន់បានទិញផងក៏ជួបក្រុមចោរវាយប្លន់យកម៉ូតូទៅបាត់តែម្តង។

ក្រោយកើតហេតុជនរងគ្រោះខាងលើបានត្រឹមតែមកដាក់ពាក្យបណ្តឹង នៅប៉ុស្តិស្រះចកតែប៉ុណ្ណោះ ៕