មណ្ឌលគិរី: ប្រជាកសិករបានរៀបរាប់ថា ជារៀងរាល់ឆ្នាំឲ្យតែដល់រដូវប្រមូលផលក្នុងខេត្តមណ្ឌលគិរី ក៏ដូចជាខេត្តនាៗដែរ គឺថាថៅកែដែលចុះមកប្រមូលទិញដំឡូងម្ដង តែងតែឲ្យតម្លៃមិនមានការកំណត់ច្បាស់លាស់ណាមួយនោះទេគឺអាស្រ័យលីមាត់គេ ជាអ្នកកំណត់តែប៉ុណ្នោះ។

សព្វថ្ងៃនេះ ពួកគាត់កំពុងតែព្រួយបារម្ភយ៉ាងខ្លាំង ជុំវិញបញ្ហា ហាងឆេងតម្លៃដំឡូងមីនៅដើមខែធ្នូនេះ ស្ថិតនៅក្នុងតម្លៃមួយទាបនៅឡើយ បើធៀបនឹងឆ្នាំមុនៗ។ ពួកគាត់អះអាងថា ប្រសិនបើតម្លៃទីផ្សារទទួលទិញដំឡូងមី ស្ថិតក្នុងតម្លៃបែបនេះ ពួកគាត់អាចប្រឈមនិងការខាតបង់ ឬចំណេញ ក្នុងកម្រិតតិចតួចប៉ុណ្ណោះ ព្រោះកសិករខ្លះ គឺពួកគាត់ជួលដីពីគេមកដាំដំណាំនេះ ចំណែកខ្លះទៀត គឺចងការលុយពីធានាគារ ឬចងការប្រាក់ឯកជន យកមកប្រកបរបរកសិកម្មមួយនេះ។

លោកពូម្នាក់សុំមិនបញ្ចេញឈ្មោះជាកសិករមួយរូបរស់នៅភូមិឃុំស្រែអំពូមស្រុកពេជ្រាដា បានលើកឡើងថា សម្រាប់ការដាំដំណាំដំឡូងមីនេះ ក៏ត្រូវចំណាយដើមទុនច្រើន ព្រោះគាត់ជួលដីពីគេមកប្រកបរបរនេះ ដើម្បីចិញ្ចឹមជីវិត ហើយដំណាំដំឡូងមី មុននឹងទទួលបានផល ក៏ត្រូវថែទាំដាក់ជីផងដែរ ទើបទទួលបានទិន្នផលល្អ។ ចំណែកក្នុងអំឡុងពេលប្រមូលផល ត្រូវមានមើមដំឡូងខ្លះខូចមិនអាចលក់បាន បួករួមទាំងត្រូវជួលកម្លាំងពលកម្មដកដំឡូងមីផង ដូច្នេះបើតម្លៃដំឡូងមីស្រស់ ស្ថិតក្នុងតម្លៃ២១០រៀល ដូចបច្ចុប្បន្ននេះ គឺទទួលបានប្រាក់ចំណេញតិចតួចប៉ុណ្ណោះ។ ដូច្នេះលោកពូសំណូមពរដល់ អជ្ញាធរ សូមជួយធ្វើឲ្យទីផ្សារតម្លៃដំឡូងមីស្រស់ឡើងត្រឹម២៥០ទៅ៣០០រៀល ក្នុង១គីឡូក្រាម ទើបអាចទទួលបានផលចំណេញច្រើន មិនប្រឈមជាមួយការខាតបង់។

លោកពូបានប្រាប់បន្តឲ្យដឹងទៀតថា ការចំណាយផ្សេងៗក្នុងមួយហិច គឺត្រូវប្រើដើមទុនរហូតដល់ជិត៤លានរៀលឯណោះ ដើម្បីបានទទួលផលវិញក្នុងចន្លោះពី១៣តោន ទៅ១៧តោន ដូច្នេះប្រសិនបើតម្លៃ ដំឡូងមីស្រស់ស្ថិតក្នុងតម្លៃ២១០រៀល ក្នុង១គីឡូក្រាម កសិករអាចប្រឈមនឹងការខាតបង់។ លោកក៏ចង់ឲ្យតម្លៃដំឡូងមីស្រស់ឡើងដល់២៥០ទៅ២៦០រៀល ក្នុង១គីឡូក្រាម ទើបសាកសមនិងកម្លាំងពលកម្មរបស់កសិករ ដែលខំប្រឹងប្រែងដាំដំណាំដំឡូងមីនេះ។

ចំណែកលោក សុង ឃាង ប្រធានមន្ទីរកសិកម្មខេត្តមណ្ឌលគិរីបានថ្លែងថា ចំពោះទីផ្សារតម្លៃដំឡូងមី គឺលោកមិនអាចសន្និដ្ឋានបានទេថា ដំឡូងមីនឹងអាចហក់ឡើងក្នុងតម្លៃខ្ពស់ ឬយ៉ាងណានោះ ព្រោះហាងឆេងដំឡូងមីពឹងផ្អែកទៅលើទីផ្សារសកលមិនអាចកំណត់បាននោះទេ៕