ភ្នំពេញៈ ជនជាតិបរទេសម្នាក់ បើករថយន្តឡិចស៊ីសខ្វះការប្រុងប្រយត្ន័ ជ្រុលចង្កូតទៅបុករបាំងថ្មចែកទ្រូងផ្លូវ យ៉ាងពេញទំហឹងបណ្តាលឲ្យបាក់អស់ចំនួន២កង់ រួចប្រញាប់បើកទ្វារ រថយន្តរត់គេចខ្លួនបាត់ស្រមោល។ ហេតុការណ៍នេះបានកើតឡើងកាលពីវេលាម៉ោង២ និង២០នាទី រំលងអាធ្រាតឈានចូលថ្ងៃទី៥ ខែធ្នូ ឆ្នាំ២០១៦ នៅចំណុចទល់មុខវត្តទួលទំពួង តាមបណ្តោយផ្លូវលេខ១៥៥ កែងផ្លូវម៉ៅសេទុង ក្នុងសង្កាត់ទួលទំពួង២ ខណ្ឌចំការមន រាជធានីភ្នំពេញ។

ប្រភពព័ត៌មានពីកន្លែងកើតហេតុ បានឲ្យដឹងថា មុនពេលកើតហេតុ គេបានឃើញរថយន្តម៉ាកឡិចស៊ីស RX300 ពាក់ស្លាកលេខ ភ្នំពេញ 2O-6235 បើកដោយជនជាតិបរទេសម្នាក់ ធ្វើដំណើរតាមបណ្តោយផ្លូវលេខ១៥៥ ទិសដៅពីត្បូងទៅជើង ក្នុងល្បឿនលឿនដូចហោះ លុះមកដល់ចំណុចកើតហេតុ រថយន្តបង្កបួងចង្កូតបត់ស្តាំមិនទាន់ ក៏រ៉េចង្កូតជ្រុលទៅបុកនឹងរបាំងថ្មចែកទ្រូងផ្លូវនៅទល់មុខនិងវត្តទួលទំពួង បាក់អស់ចំនួន២កង់ ចំណែករថយន្តអូសជាប់ជាមួយនឹងរបាំងថ្មទៅមុខលែងរួច។ភ្លាមៗនោះដែរ គេឃើញជនជាតិបរទេសរូបនោះ បានប្រមូលអ៊ីវ៉ាន់ចេញពីក្នុងរថយន្ត រត់ឡើងជិះតាក់ស៊ីគេចខ្លួនបាត់ស្រមោល បន្សល់ទុករថយន្តនៅនឹងកន្លែងកើតហេតុ។

ក្រោយកើតហេតុរថយន្តបង្កត្រូវបានសមត្ថកិច្ចស្ទូចយកទៅរក្សាទុកនៅការិយាល័យចរាចរណ៍ជើងគោក នៃស្នងការដ្ឋាននគរបាលរាជធានីភ្នំពេញ ដើម្បីរង់ចាំម្ចាស់រថយន្តចូលខ្លួនមកដោះស្រាយទៅតាមផ្លូវច្បាប់៕