ភ្នំពេញៈ យ៉ាងហោចណាស់មនុស្ស៣នាក់បានស្លាប់ និង៤នាក់រងរបួសធ្ងន់ ក្នុងករណីគ្រោះថ្នាក់ចរាចរមួយដែលបានកើតឡើងរវាងម៉ូតូ២គ្រឿងបុកគ្នាយ៉ាងពេញទំហឹងនៅលើផ្លូវជាតិលេខ៤ ត្រង់មុខបុរីសែនមនោរម្យ កាលពីវេលាម៉ោងជាង១រំលងអាធ្រាត្រ ឈានចូលថ្ងៃទី៦ ខែធ្នូ ឆ្នាំ២០១៦ ស្ថិតក្នុងសង្កាត់ចោមចៅ ខណ្ឌពោធិសែនជ័យ។

ប្រភពពីប្រជាពលរដ្ឋដែលធ្វើដំណើរតាមផ្លូវ និងជាអ្នកឃើញហេតុការណ៍បានឲ្យដឹងថា មុនកើតហេតុគេ ឃើញម៉ូតូទាំង២គ្រឿងបើកបញ្រ្ចាស់ទិសគ្នាក្នុងល្បឿយ៉ាងលឿន លុះបើកមកដល់ចំណុចកើតហេតុ ស្រាប់តែម៉ូតូDream C125 វ៉ារថយន្ត១គ្រឿងដែលនៅខាងមុខមិនផុតក៏បានជ្រុលទៅបុកម៉ូតូSmash យ៉ាងពេញទំហឹង បណ្តាលឲ្យស្លាប់មនុស្ស២នាក់ភ្លាមៗនៅនឹងកន្លែងផងដែរ និងម្នាក់ទៀតបានស្លាប់នៅពេលដឹកយកទៅសង្គ្រោះនៅមន្ទីរពេទ្យ។ សម្រាប់អ្នករងរបួសធ្ងន់៤នាក់ទៀត ត្រូវបានដឹកយកទៅសង្គ្រោះបន្ទាន់នៅមន្ទីរពេទ្យ។

ក្រោយកើតហេតុ សាកសពត្រូវបានក្រុមគ្រួសារ មកទទួលយកទៅធ្វើបុណ្យតាមប្រពៃណីនៅស្រុកំណើត។ ចំណែកមធ្យាបាយធ្វើដំណើរទាំង២ ត្រូវបានសមត្ថកិច្ចជំនាញចុះមកវាស់វែង និងស្ទួចយកទៅរក្សារទុកនៅការិយាល័យចរាចរជើងគោកនៃស្នងការដ្ឋាននគរបាលក្រុងភ្នំពេញ ដើម្បីរងចាំដោះស្រាយគ្នានៅពេលក្រោយ៕