ភ្នំពេញ: ក្រសួងពាណិជ្ជកម្ម នឹងរៀបចំព្រឹត្តិការណ៍ដ៏មានសារសំខាន់មួយហៅថា “យុទ្ធនាការទិញផលិតផលខ្មែរ” លើកទី១ នៅព្រះរាជាណាចក្រកម្ពុជា ចាប់ពីថ្ងៃទី២៦ ខែឧសភា ដល់ថ្ងៃទី៦ ខែវិច្ឆិកា ឆ្នាំ២០១៦ នៅរាជធានីភ្នំពេញ និងតាមបណ្ដាខេត្តមួយចំនួនសំដៅលើកស្ទួយផលិតខ្មែរ។ ព្រឹត្តិការណ៍នេះ នឹងមានការដាក់តាំងបង្ហាញផលិតផលខ្មែរ ការធ្វើសិក្ខាសាលា និងការដង្ហែក្បួន នៅរាជធានីភ្នំពេញផងដែរ។

យោងតាមសេចក្ដីជូនដំណឹងរបស់ក្រសួងពាណិជ្ជកម្ម ដែល Post News ទទួលបាននៅព្រឹកថ្ងៃទី៤ ខែឧសភា ឆ្នាំ២០១៦នេះ ក្រសួងពាណិជ្ជកម្ម មានបំណងឲ្យផលិតករ អាជីវក អង្គការ សមាគម និងសាធារណ:ជន ដែលបាន និងកំពុងផលិតនូវផលិតផលខ្មែរ សម្រាប់ចែកចាយនៅទូទាំងប្រទេសកម្ពុជា សហការក្នុងការចូលរួមក្នុងព្រឹត្តិការណ៍ដ៏មានសារសំខាន់នេះ។

ម្ចាស់អាជីវកម្ម ផលិតករ អង្គការ សមាគម និងសាធារណ:ជន មានបំណងចូលរួមក្នុងព្រឹត្តិការណ៍ខាងលើនេះ សូមមេត្តារួសរាន់ទៅចុះឈ្មោះនៅក្រសួងពាណិជ្ជកម្ម (នាយកដ្ឋានអភិវឌ្ឍន៍ទីផ្សារ) ឲ្យបានមុនថ្ងៃទី១៥ ខែឧសភា ឆ្នាំ២០១៦ ជាកំហិត។

“យុទ្ធនាការទិញផលិតផលខ្មែរ” នឹងត្រូវរៀបចំធ្វើឡើងក្នុងខេត្តសៀមរាប កំពង់ចាម ព្រះសីហនុ និងរាជធានីភ្នំពេញ តាមកាលបរិច្ឆេទដូចខាងក្រោម៖

១-ខេត្តសៀមរាប៖ ពិព័រណ៌ពាណិជ្ជកម្ម ពីថ្ងៃទី២៦-២៩ ខែឧសភា ឆ្នាំ២០១៦ នឹងធ្វើសិក្ខាសាលានៅថ្ងៃទី២៧ ខែឧសភា ឆ្នាំ២០១៦។

២-ខេត្តកំពង់ចាម៖ ពិព័រណ៌ពាណិជ្ជកម្ម ពីថ្ងៃទី២៣-២៦ ខែមិថុនា ឆ្នាំ២០១៦ នឹងធ្វើសិក្ខាសាលានៅថ្ងៃទី២៤ ខែមិថុនា ឆ្នាំ២០១៦។

៣-ខេត្តព្រះសីហនុ៖ ពិព័រណ៌ពាណិជ្ជកម្ម ពីថ្ងៃទី១៤-១៧ ខែកក្កដា ឆ្នាំ២០១៦ នឹងធ្វើសិក្ខាសាលានៅថ្ងៃទី១៥ ខែកក្កដា ឆ្នាំ២០១៦។

៤-រាជធានីភ្នំពេញ៖ ពិព័រណ៌ពាណិជ្ជកម្ម ពីថ្ងៃទី៣-៦ ខែវិច្ឆិកា ឆ្នាំ២០១៦ ដង្ហែក្បួន នៅថ្ងៃទី៣ ខែវិច្ឆិកា ឆ្នាំ២០១៦ នឹងធ្វើសិក្ខាសាលានៅថ្ងៃទី៤ ខែវិច្ឆិកា ឆ្នាំ២០១៦៕