ភ្នំពេញ ៖ ដោយការបារម្ភ និងភ័យខ្លាចពីសុវត្ថិភាពរបស់កូនស្រី ស្រ្តីជាម្តាយបានមកប្តឹងប៉ូលិសនៅប៉ុស្តិ៍ចោមចៅ កាលពីវេលាម៉ោង១០ និង៣០នាទីព្រឹកថ្ងៃទី១៥ ធ្នូ នេះ ដើម្បីសុំការអន្តរាគមន៍ពីប៉ូលិសឱ្យជួយតាមរកកូនស្រីដែលកំពុងបាត់ខ្លួន បន្ទាប់ពីកូនទៅលក់កំពឹសនៅឯផ្សារត្រពាំងថ្លឹង ហៅផ្សារ «យាយម៉េវ» ស្ថិតក្នុងភូមិត្រពាំងថ្លឹង សង្កាត់ចោមចៅ ខណ្ឌពោធិ៍សែនជ័យ ដោយអត់ឃើញត្រឡប់ទៅផ្ទះវិញ ។
ប្រភពឱ្យដឹងថា ក្មេងស្រីដែលបាត់ខ្លួននោះ ឈ្មោះហ៊ីន ស្រីណែត អាយុ១៤ឆ្នាំ (ជាកូនស្រីពៅ) មានឪពុកឈ្មោះគង់ ថន អាយុ៣៩ឆ្នាំ និងម្តាយឈ្មោះជា អាង អាយុ៣៦ឆ្នាំ ពួកគេមានស្រុកកំណើតនៅខេត្តតាកែវ បច្ចុប្បន្នស្នាក់នៅផ្ទះជួល ក្បែររោងចក្ររោងចក្រ «ហុងហ្គា» ក្នុងភូមិព្រៃល្វា សង្កាត់ចោមចៅ ខណ្ឌពោធិ៍សែនជ័យ ។
បើតាមសម្តីឪពុកម្តាយខាងលើបានរៀបរាប់ថា ក្រុមគ្រួសារគាត់មានមុខរបរជាអ្នកលក់កំពឹស និងត្រីនៅក្នុងផ្សារខាងលើ ដោយឱ្យកូនស្រីរូបនោះ ជួយលក់ជារៀងរាល់ព្រឹក ។ នៅថ្ងៃកើតហេតុនោះ ដោយមិនឃើញកូនស្រីត្រឡប់ទៅផ្ទះវិញទេ ដោយពួកគាត់រង់ចាំ និងតាមរកផងដែរ ។ លុះដល់វេលាម៉ោង០៨យប់ថ្ងៃទី១៤ ធ្នូ ក៏៏មានទូរសព្ទហៅចូលមកពួកគាត់ ហើយឮសំឡេងកូនស្រីគាត់និយាយថា «កំពុងនៅប៉ោយប៉ែត ជួយផងម៉ែ» ហើយក៏បិទទូរសព្ទវិញ ។ ពួកគាត់ក៏ព្យាយាមតេទៅវិញរាប់រយដង តែត្រូវលេខនោះបិទទូរសព្ទ តេលែងចូលរហូត ។
ឪពុកម្តាយបានបន្តទៀតថា កូនស្រីគាត់នោះ កន្លងមកធ្លាប់រត់ចេញពីផ្ទះ២ដងហើយ ដោយម្តងខឹងគាត់ រត់ទៅខេត្តព្រះសីហនុ តែត្រូវបងប្អូននៅទីនោះ សួរចុះឡើងបានលេខទូរសព្ទគាត់ ក៏ជួយខលហៅគាត់មកទទួលកូនវិញ។ មួយលើកទៀតទៅលេងនៅក្លឹបកម្សាន្ត ក៏បាត់ខ្លួនទៀត ។
ទោះបីជាយ៉ាងណា ទោះកូនស្រីមានប្រវត្តិធ្លាប់ចេញពីផ្ទះយ៉ាងណាក៏ដោយ តែការបាត់លើកនេះ ក៏ធ្វើឱ្យពួកគាត់បារម្ភពីសុវត្ថិភាពកូនស្រីណាស់ ខ្លាចកូនចាញ់បោក និងជឿតាមការញ៉ុះញង់របស់គេ ដូច្នេះ ទើបពួកគាត់មកសុំការអន្តរាគមន៍ពីប៉ូលិស ជួយតាមរកតែម្តង ៕
ស្តាប់សម្លេងដូចខាងក្រោមនេះ៖
https://www.youtube.com/watch?v=cNpCORODW9s&feature=youtu.be
មតិយោបល់