សៀមរាប: ទូរសព្ទដៃទំនើប និងកុំព្យូទ័រសរុប៧១គ្រឿង ត្រូវបាន​មន្ត្រីគយប្រចាំច្រកអាកាសយានដ្ឋានអន្តរជាតិសៀមរាប បង្ក្រាបបានពីបុរស​ជនជាតិចិនម្នាក់ ដែលលួចនាំចូល​គេចពន្ធពីប្រទេសចិន។

ការបង្ក្រានេះ ធ្វើឡើងកាលពីវេលាម៉ោង១០និង២០នាទីយប់ថ្ងៃទី១៧ ខែធ្នូ ឆ្នាំ២០១៦ នៅច្រកអាកាសយានដ្ឋានអន្តរជាតិសៀមរាប។

មន្ត្រីគយបានឲ្យដឹងថា ជនសង្ស័យឈ្មោះ Chen Anhui ភេទប្រុស អាយុ២៧ឆ្នាំ ជនជាតិចិនកាន់លិខិតឆ្លងដែនលេខE72577910។ ជនសង្ស័យបានធ្វើដំណើរមកពីប្រទេសចិន ហើយប្តូរជើងហោះហើរនៅទីក្រុងមេនីឡា ប្រទេសហ្វីលីពិន ហោះឆ្ពោះមកទីក្រុងសៀមរាប តាមជើងហោះហើរលេខ 5J 257(MNL-REP)។

ប្រភពបានបន្តទៀតថា ទូរសព្ទ និងកុំព្យូទ័រ ដែលជនជាតិចិនលួចនាំចូលទាំងមិនបង់ពន្ធនេះ រួមមាន​ ៖ ទូរសព្ទ Iphone 5 ចំនួន៤០គ្រឿង កុំព្យូទ័រ Laptop នៅថ្មីម៉ាក Asus ចំនួន២០គ្រឿង ម៉ាក Lenovo ចំនួន ៥គ្រឿង និងកុំព្យូទ័រ Laptop ប្រើរួចម៉ាក Lenovo ចំនួន២គ្រឿង និងម៉ាក Asus ចំនួន៤គ្រឿង។

ក្រោយពីឃាត់ខ្លួនជនសង្ស័យ និងវត្ថុតាង ត្រូវបានកម្លាំង​គយធ្វើកំណត់ហេតុ បញ្ជូនទៅអគ្គនាយកដ្ឋានគយ និងរដ្ឋាករកម្ពុជា ដើម្បីដោះស្រាយទៅតាមនីតិវិធីនៃច្បាប់ស្តីពីគយ។

សូមរម្លឹកផងដែរថា កន្លងមកកម្លាំងគយប្រចាំ ច្រកព្រលានយន្តហោះអន្តរជាតិសៀមរាប ធ្លាប់ចាប់បាន ទំនិញជាច្រើន ដែលក្រុមឈ្មួញនាំចូលមកពីបរទេសមិនបានបង់ពន្ធ។ ករណីនេះ ត្រូវបាន គេលើកឡើងថា ច្រកមួយនេះ សម្បូរ​ឈ្មួញរកស៊ីអំពើរត់ពន្ធយ៉ាងច្រើន ជាមួយគ្នានេះ កន្លងទៅកម្លាំង​គយព្រលានយន្តហោះសៀមរាប ធ្លាប់ចាប់ថ្នាំសម្រើប ហើយធ្វើការដោះលែងទៅវិញ ជាថ្នូរទៅនឹងទឹកប្រាក់រាប់ម៉ឺនដុល្លារ រហូតមកដល់ ពេលនេះ មិនត្រូវបានថ្នាក់លើមានវិធានការទៅលើគយច្រកនេះនៅឡើយទេ ខណ:មហាជនកំពុងតែតាមដានយ៉ាងខ្លាំង រឿងដោះលែងថ្នាំសម្រើបនោះ៕