Post News Media ព័ត៌មានជាតិ ក្រុមស្ទាវកាប...

ក្រុមស្ទាវកាប់ប្តីរបួសធ្ងន់ ស្ត្រីជាប្រពន្ធមកដាក់ពាក្យបណ្តឹងឲ្យសមត្ថកិច្ចជួយ

ភ្នំពេញ: ស្ត្រីម្នាក់ បានមកដាក់ពាក្យបណ្តឹងនៅប៉ុស្តិ៍នគរបាលរដ្ឋបាលស្ទឹងមានជ័យ ដើម្បីឲ្យសមត្ថកិច្ចជួយរកយុត្តិធម៌ដល់ប្តីរបស់គាត់ ដែលត្រូវក្រុមស្ទាវកាប់នឹងដាវសាំម៉ូរ៉ៃជាច្រើនកន្លែង បណ្តាលឲ្យរងរបួសធ្ងន់ និងកំពុងតែសម្រាកព្យាបាលនៅមន្ទីរពេទ្យរុស្ស៊ី កាលពីព្រឹកថ្ងៃទី២២ ខែធ្នូ ឆ្នាំ២០១៦។

បើតាមសម្តីស្ត្រីជាប្រពន្ធជនរងគ្រោះឈ្មោះ សៀង សុនី អាយុ៤៣ឆ្នាំ បានឲ្យដឹងថា ប្តីរបស់គាត់មានឈ្មោះ ឆោម នឿន អាយុ៤៤ឆ្នាំ ស្នាក់នៅផ្ទះជួល ក្រុម៤ ភូមិដំណាក់១ សង្កាត់ស្ទឹងមានជ័យ ខណ្ឌមានជ័យ ត្រូវបានក្រុមស្ទាវកាប់នឹងដាវសាំម៉ូរ៉ៃជាច្រើនកន្លែង បណ្តាលឲ្យរងរបួសធ្ងន់។

ប្រភពដដែលបានបន្តថា កាលពីយប់ ថ្ងៃទី២០ ខែធ្នូ ឆ្នាំ២០១៦ មានក្រុមក្មេងស្ទាវ២នាក់ជិះម៉ូតូម៉ាក សេ១២៥មួយគ្រឿង ពុំចាំស្លាកលេខ នៅម្តុំសេះហោះ ភូមិដំណាក់ធំ១ សង្កាត់ស្ទឹងមានជ័យ ខណ្ឌមានជ័យ ខណ:ពេលដែលជិះជ្រែចុះឡើងបានដួលម៉ូតូ ហើយជនរងគ្រោះក៏បានជួយលើកម៉ូតូរបស់ក្រុមស្ទាវ ដោយជនរងគ្រោះបាននិយាយថា ខំជួយលើកម៉ូតូពួកវាហើយមិនបានអរគុណសូម្បីតែមួយម៉ាត់ ហើយជនសង្ស័យខាងលើក៏បោះពាក្យសម្តីថា ក្តអីអ្ហា អ្ហែងចាំមើលអញមកវិញ។ មួយសន្ទុះក្រោយមក ក្រុមស្ទាវខាងលើនោះបានត្រឡប់មកវិញដោយមានសាំម៉ូរ៉ៃ២ដើម មកកាប់ចិញ្ច្រាំលើជនរងគ្រោះជាច្រើនដាវបណ្តាលឲ្យដេកដួលក្នុងថ្លុកឈាម ត្រូវបានក្រុមគ្រួសារបញ្ជូនទៅសង្គ្រោះបន្ទាន់នៅមន្ទីរពេទ្យរុស្ស៊ី។

ប្រភពដដែលបានបញ្ជាក់ថា គាត់បានសម្រេចចិត្តមកប្តឹងពេលនេះ ដើម្បីឲ្យសមត្ថកិច្ចជួយរកយុត្តិធម៌ឲ្យប្តីរបស់គាត់ ដែលត្រូវក្រុមស្ទាវកាប់នឹងដាវសាំម៉ូរ៉ៃជាច្រើនកន្លែងបណ្តាលឲ្យរងរបួសធ្ងន់ដែលកំពុងតែសម្រាកព្យាបាលនៅមន្ទីររុស្ស៊ី កំពុងតែខ្វះខាតថ្លៃព្យាបាលដោយចង់ឲ្យជនបង្ក ចេញមុខមកដោះស្រាយសំណង។ ម្យ៉ាងវិញទៀត ជនដែលកាប់ប្តីរបស់គាត់នោះ គឺគាត់បានស្គាល់មុខនិងអត្តសញ្ញាណហើយ គឺជាក្រុមប្រើប្រាស់គ្រឿងញៀនដែលនៅក្បែរផ្ទះរបស់គាត់ គាត់ថាចាំមើលប៉ូលិសប៉ុស្តិ៍ស្ទឹងមានជ័យមានចំណាត់ការយ៉ាងណាទៅលើជនបង្ក៕

Loading...