ភ្នំពេញៈ យុវជនម្នាក់បានស្លាប់ភ្លាមៗ ដោយសាររថយន្តដឹកដីមួយគ្រឿងបុកបែកក្បាលយ៉ាងអាណោចអាធ័ម ហេតុការណ៍គ្រោះថ្នាក់ចរាចរណ៍នេះ បានកើតឡើងកាលពីវេលាម៉ោង១០និង៥០នាទីព្រឹកថ្ងៃទី០៤ ខែមករា ឆ្នាំ២០១៧ ស្ថិតនៅបណ្ដោយផ្លូវ៣៧១ ភូមិត្នោតជ្រំ៣ សង្កាត់បឹងទំពុន ខណ្ឌមានជ័យ រាជធានីភ្នំពេញ។
ប្រភពព័ត៌មានពីកន្លែងកើតហេតុបានឲ្យដឹងថា នៅមុនពេលកើតហេតុ គេឃើញយុវជនរងគ្រោះខាងលើ ជិះម៉ូតូមួយគ្រឿងម៉ាក Smash v ពណ៌ខ្មៅ ពាក់ស្លាកលេខ ភ្នំពេញ 1J-3245 ធ្វើដំណើរទិសដៅពីលិចទៅកើត ហើយក៏បានគេចពីរថយន្តដឹកដែក ដែលបម្រុងបត់ចូលក្នុងក្រុមហ៊ុន ដែលនៅក្បែរកន្លែងកើតហេតុក៏បានដួល ខណៈនោះក៏មានរថយន្តដឹកដីមួយគ្រឿងទៀតម៉ាក HINO ពាក់ស្លាកលេខ តាកែវ 3A-0446 ដែលបើកបរស្របទិសដៅគ្នា បានបុកយុវជនជិះម៉ូតូនោះពេញទំហឹង បណ្ដាលឲ្យស្លាប់ភ្លាមៗនៅនឹងកន្លែងកើតហេតុ ។ បន្ទាប់មកអ្នកបើកបររថយន្តខាងលើ បានព្យាយាមបើករត់គេច តែត្រូវបានប្រជាការពារភូមិឃាត់ខ្លួនបានទាំងអ្នកបើកបរ និងរថយន្តនៅក្បែរកន្លែងកើតហេតុ។
សមត្ថកិច្ចបានឲ្យដឹងថា អ្នកបើកបររថយន្តខាងលើមានឈ្មោះ សុខ ចន្ថា ភេទប្រុស អាយុ៣៣ឆ្នាំ ស្នាក់នៅភូមិជើងឯក សង្កាត់ជើងឯក ខណ្ឌដង្កោ រាជធានីភ្នំពេញ មុខរបរ បើកបររថយន្ត រីឯយុវជនរងគ្រោះខាងលើពុំទាន់ស្គាល់អត្តសញ្ញាណនោះទេ សមត្ថកិច្ចកំពុងស្រាវជ្រាវរកក្រុមគ្រួសារសាច់ញាតិយកទៅធ្វើបុណ្យ។
ចំណែករថយន្ត និងម៉ូតូរួមទាំងអ្នកបើកបរ ត្រូវបានបញ្ជូនទៅកាន់ការិយាល័យចរាចរណ៍ក្រុង ដើម្បីដោះស្រាយគ្នានៅពេលក្រោយ៕
https://youtu.be/87t0ZjH_jEE
មតិយោបល់