ភ្នំពេញ ៖ ទឹកប្រាក់ជាង ១៣០០០ដុល្លារ ដែលទទួលបានពីសប្បុរសជនជាច្រើន កម្មវិធីទទួលទានអាហាដើម្បីមនុស្សធម៌ ដើម្បី ជួយទៅដល់មន្ទីរពេទ្យកុមារអង្គរខេត្តសៀមរាប ដែលកំពុងជួបការខ្វះខាតយ៉ាងខ្លាំង។
កម្មវិធីនេះ រៀបចំឡើងដោយ ក្រុមសហស្សវត្សមនុស្សធម៌ និង មន្ទីរពេទ្យកុមារអង្គរខេត្តសៀមរាប ព្រមទាំងមន្ទីរពិសោធន៍ វេជ្ជសាស្ត្រកម្ពុជា និង ក្រុមសម្ព័ន្ធឌីជេកម្ពុជា កាលពីថ្ងៃទី២ ខែមេសា ឆ្នាំ២០១៦ នៅភៅជនីយដ្ឋាន ទន្លេបាសាក់២ ដោយមាន ការសម្តែង ការប្រគុំតន្ត្រី និងច្រៀងកម្សាន្ត របស់សិល្ប:ករ សិល្ប:ការិនីខ្មែរ ដូចជា អ្នកនាង យុគ ចិន្តា លោក សុះ ម៉ាច និង លោក ហ្សូណូ ឌីជេក្តឹប លោកសុខ គា រួមជាមួយនឹងតារាកិត្តិយសខ្មែរ ជាច្រើនអ្នកទៀត។
នៅក្នុងរាត្រីនោះដែរ ក៏មានកម្មវិធីការចាប់ឆោ្នតផ្សងសំណាងយកនូវរង្វាន់ជាច្រើន សំរាប់អ្នកដែលបានចូលរួមដើម្បីធ្វើកម្មវិធី នារាត្រីនោះ ឲ្យកាន់តែសប្បាយរីករាយថែមទៀត។ តម្លៃសំបុត្រសំរាប់ការចូលរួម គឺ ២៥ ដុល្លារអាមេរិក ក្នុងមួយនាក់ ដែលអាចនឹងមានអ្នកចូលរួមប្រមាណពី ១០០ ទៅ ១៥០ នាក់ ដែលអ្នកទាំងនោះ មកពីបណ្តាក្រុមហ៊ុន និងស្ថាប័ន្ធផ្សេងៗ ជាច្រើនទៀតផង។
លោកវេជ្ជបណ្ឌិត ងួន ច័ន្ទភក្ត្រា ប្រធានមន្ទីរពេទ្យកុមារអង្គរខេត្តសៀមរាប បានឲ្យដឹងថា មន្ទីរពេទ្យកុមារអង្គរ គឺជាមន្ទីរពេទ្យកុមារមួយបង្កើតឡើងក្នុងឆ្នាំ ១៩៩៩ ដោយជាងថតរូបជនជាតិជប៉ុន លោក ខេនរ៉ូ អ៊ីស៊ុ ដើម្បីផ្តល់នូវការ ពិនិតព្យាបាល និងថែទាំសុខភាពប្រកបទៅដោយគុណភាពខ្ពស់ និងក្តីមេត្តាករុណាដល់កុមារមកពីគ្រប់ទិសទី ទូទាំងព្រះរាជាណាចក្រកម្ពុជា ដោយឥតគិតថ្លៃ។ មន្ទីរពេទ្យកុមារអង្គរ មានទីតាំងនៅលើផ្លូវព្រះសង្ឃរាជ ទេព វង្ស និងវិថី អ៊ុំ ឆាយ (ជិតផ្សារកណ្តាល និងវិទ្យាល័យ១០មករា ១៩៧៩ ខេត្តសៀមរាប)។
លោកវេជ្ជបណ្ឌិត បន្តថា ជាមួយទស្សន:វិស័យដែលកុមារគ្រប់រូប នឹងទទួលបានសិទ្ធិ ក្នុងការដែលមានជីវិត ពោរពេញដោយ សុខុមាលភាព ទោះជាពួកគេរស់នៅក្នុងស្ថានភាពណាក៏ដោយ។ មកដល់សព្វថ្ងៃនេះមន្ទីរពេទ្យកុមារអង្គរ បានទទួល ការព្យាបាលប្រមាណជាង ១លាន ៥សែន ករណីដែលកើតឡើងចំពោះកុមារកម្ពុជា ជាពិសេសកុមារមកពីតាមជនបទ និងក្រីក្រ។
លោកប្រធានមន្ទីរពេទ្យ បន្ថែមថា បច្ចុប្បន្ន មន្ទីរពេទ្យកុមារអង្គរ មានបុគ្គលិកសរុប ៥១០នាក់ ដែល៩៩ភាគរយ ជាជនជាតិខ្មែរ រួមទាំងថ្នាក់ដឹកនាំមន្ទីរពេទ្យផងដែរ។ នៅក្នុងឆ្នាំ២០១៦នេះ មន្ទីរពេទ្យកុមារអង្គរ មានគម្រោងថវិកាចំណាយលើការ ពិនិត្យ ព្យាបាល និងថែទាំសុខភាពកុមារ ប្រមាណជាង ៧លាន ១សែន ដុល្លារ ដែលថវិកាទាំងនោះ មួយភាគធំបានមកពីជំនួយ របស់សប្បុរសជន នៅបរទេស ដូចជាប្រទេសសិង្ហបុរី ហុងកុង អង់គ្លេស ជប៉ុន សហរដ្ឋអាមេរិក អ៊ីតាលី ម៉ាឡេស៊ី និង អាល្លឺម៉ង់ជាដើម។ ក្នុងនោះដែរ ខាងភោជនីដ្ឋាន ទន្លេបាសាក់២ ក៏បានចូលរួម ជាមួយកម្មវិធីមនុស្សធម៌នេះផងដែរ។
សូមបញ្ជាក់ថា ភោជនីដ្ឋាន ទន្លេបាសាក់២ ក៏មានសេវារៀបចំអាពាហ៍ពិពាហ៍ តាមគេហដ្ឋាន និងអគារមង្គលការផ្សេងៗ ចាប់ពី ១៧០ដុល្លារ ក្នុងមួយតុ៕
មតិយោបល់