ភ្នំពេញ: មជ្ឈមណ្ឌលអូស្ត្រាលីសម្រាប់ការបណ្តុះបណ្តាល (ACE) បានរៀបចំកម្មវិធីដើម្បីសប្បុរសធម៌ និង អបអរប្រពៃណីខ្មែរ ក្នុងគោលបំណងអបអរសាទរពិធីបុណ្យចូលឆ្នាំប្រពៃណីខ្មែរ ដែលនឹងឈានចូលមកដល់នាពេលដ៏ខ្លីខាងមុខក៏ ដូចជា ដើម្បីប្រមូលថវិកា សម្រាប់បរិច្ចាគដល់ អង្គការដើម្បីភាពញញឹមនៃកុមារ (PSE) នៅព្រឹកថ្ងៃទី៣ ខែមេសា ឆ្នាំ២០១៦ នៅ ACE ទួលទំពូង។
កញ្ញា ប៉ាន់ ពុទ្ធី មន្ត្រីទីផ្សា និងជាអ្នករៀបចំកម្មវិធី បានមានប្រសាសន៍ថា កម្មវិធី ACE ដើម្បីសប្បុរសធម៌ និង អបអរប្រពៃណីខ្មែរ
ដោយមានទឹកចិត្តស្រឡាញ់ការជួយសង្គ្រោះ និង គាំទ្រដល់ការអភិរក្សវប្បធម៌ ប្រពៃណីខ្មែរ ជាមួយនឹងការគាំទ្រយ៉ាងខ្លាំង ពីសំណាក់មជ្ឈមណ្ឌលអូស្ត្រាលីសម្រាប់ការបណ្តុះបណ្តាល ឬហៅកាត់ថា អេ.ស៊ី.អ៊ី (ACE)។ ក្រុមការងារ ឯកអគ្គរដ្ឋទូតសុឆន្ទ:សិស្ស ACE បានផ្តួចផ្តើមមូលមតិគ្នារៀបចំកម្មវិធីសប្បុរសធម៌ និងអបអរប្រពៃណីខ្មែរដែលនឹងប្រព្រឹត្តទៅនៅថ្ងៃទី៣ ខែមេសា ឆ្នាំ២០១៦ ដោយមានឈ្មោះថា “កម្មវិធី ACE ដើម្បីសប្បុរសធម៌ និង អបអរប្រពៃណីខ្មែរ” ក្នុងគោលបំណងអបអរសាទរពិធីបុណ្យចូលឆ្នាំប្រពៃណីខ្មែរ ដែលនឹងឈានចូលមកដល់នាពេលដ៏ខ្លីខាងមុខ ក៏ដូចជា ដើម្បីប្រមូលថវិកាសម្រាប់បរិច្ចាគដល់អង្គការដើម្បីភាពញញឹមនៃកុមារ ហៅកាត់ថា (PSE)។ PSE ជាអង្គការមួយ ដែលកំពុងធ្វើការយ៉ាងសកម្ម ក្នុងការជួយសង្គ្រោះកុមារក្រីក្រកម្ពុជា រាប់ពាន់នាក់ តាមរយ:ការផ្តល់ការអប់រំ ជំនាញ វិជ្ជាជីវ: និងតម្រូវការចាំបាច់សម្រាប់គ្រួសាររបស់ពួកគេ។
កញ្ញា ពុទ្ធី បានបន្តថា បច្ចុប្បន្នអង្គការមនុស្សធម៌មួយនេះ កំពុងជួបប្រទះការខ្វះខាតជំនួយយ៉ាងខ្លាំង ក្នុងការទ្រទ្រង់ដល់កុមារក្រីក្រទាំងនេះ។ ថវិកាទាំងអស់ ដែលទទួលបានពីការលក់សំបុត្រ និងវត្ថុអនុស្សាវរីយ៍ផ្សេងៗ នឹងយកទៅបរិច្ចាគទៅដល់អង្គការមួយនេះ។
កម្មវិធីនេះបានប្រព្រឹត្តិទៅចាប់ពីម៉ោង ៧:៣០នាទីព្រឹក ដល់ ម៉ោង ៦:៣០នាទីល្ងាចនៅ សាលារៀន ACE ទួលទំពូងដោយមានការចូលរួមយ៉ាងកុះករពីសំណាក់សិស្សានុសិស្ស ដែលកំពុងសិក្សានៅសាលា ACE និងនៅសាលានានា ក៏ដូចជាមាតាបិតាដើម្បីចូលរួមក្នុងសកម្មភាពផ្សេងៗរួមមាន ការលេងល្បែងប្រជាប្រិយ ការសម្តែងរាំ និងច្រៀង របាំត្រុដ និងការរាប់បាត្រប្រគេនព្រះសង្ឈចំនួន ៥០ ព្រះអង្គ នាពេលព្រឹកផងដែរ។
កម្មវិធីនេះក៏មានការគាំទ្រពីស្ថាប័នមួយចំនួនមានដូចជា Nikon, Monument book, Digi, NesCafe, SMART, Big Apple Donut, Woobee, BrewHouse, Coca and Dasani, Akasa and Domino’s Pizza ។ ក្រុមការងារឯកអគ្គរដ្ឋទូតសុឆន្ទ: សិស្សនៃមជ្ឈមណ្ឌលអូស្ត្រាលីសម្រាប់ការបណ្តុះបណ្តាល សង្ឃឹមយ៉ាងម៉ុតមាំថា កម្មវិធី ACE ដើម្បីសប្បុរសធម៌ និង អបអរប្រពៃណីខ្មែរ នឹងនាំមកភាពសប្បាយរីករាយដល់សិស្សានុសិស្ស និងមាតាបិតា ដ៏ដូចជាទទួលបានថវិការបរិច្ចាគថវិកាមួយចំនួនធំដល់អង្គការដើម្បីភាពញញឹមនៃកុមារ៕
មតិយោបល់