ភ្នំពេញៈ ជសង្ស័យម្នាក់ រួមជាមួយនិងថ្នាំញៀនចំនួន១០កញ្ចប់តូច ត្រូវបានសមត្ថកិច្ចនគរបាលខណ្ឌមានជ័យធ្វើការឃាត់ខ្លួនក្រោយចុះធ្វើរដ្ឋបាលតាមបន្ទប់ផ្ទះជួល។ការបង្ក្រាបនេះបានធ្វើឡើងកាលពីវេលាម៉ោង ១១និង១៥នាទី ថ្ងៃទី៧ ខែមករា ឆ្នាំ ២០១៧ ស្ថិតនៅក្រុមទី១ ភូមិមានជ័យ១ សង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ។

ប្រតិបត្តិការនេះដែរ មានការដឹកនាំកម្លាំងដោយលោក ហួរ ម៉េងវ៉ាង អធិការរងខណ្ឌមានជ័យ បានសហការជាមួយលោក ម៉ៅ សាវឿន នាយប៉ុស្ដិ៍នគរបាលរដ្ឋបាលសង្កាត់ស្ទឹងមានជ័យ និងមានការចូលរួមជាមួយកម្លាំងអន្ដរាគមន៍ និងកម្លាំងនគរបាលព្រហ្មទណ្ឌកម្រិតធ្ងន់ក្រុង បានដឹកនាំកម្លាំងចុះមកធ្វើរដ្ឋបាលនៅទីតាំងខាងលើ ដោយធ្វើការឆែកឆេរផ្ទះជនសង្ស័យឈ្មោះ មឿន ចាន់មករា អាយុ២២ឆ្នាំ មុខរបរអ្នកអ៊ុតសក់ ស្នាក់នៅកន្លែងកើតហេតុខាងលើ រកឃើញនូវគ្រឿងញៀន ១០កញ្ចប់តូច នៅក្នុងផ្ទះយុវជនខាងលើ ទើបសមត្ថកិច្ចសម្រេចធ្វើការចាប់ខ្លួនតែម្តង ។

បច្ចុប្បន្នជនសង្ស័យខាងលើ រួមនិងវត្ថុតាង ត្រូវបានសមត្ថកិច្ចនាំមកកាន់ប៉ុស្ដិ៍នគរបាលរដ្ឋាបាលសង្កាត់ស្ទឹងមានជ័យ ដើម្បីធ្វើការសួរ និងកសាងសំណុំរឿងបញ្ជូនខ្លួនទៅកាន់អធិការរដ្ឋាននគរបាលខណ្ឌមានជ័យ ដើម្បីចាត់ការតាមនីតិវិធីច្បាប់៕

https://youtu.be/-J546_jajlQ