សៀមរាប:តាមសេចក្តីរាយការណ៍បានឲ្យដឹងថា នៅមុននេះបន្តិច មានករណីគ្រោះថ្នាក់បង្កឡើងដោយ​រថយន្តក្រុងរបស់ក្រុមហ៊ុន “ពន្លឺអង្គរខ្មែរ”បុកម៉ូតូ​អ្នកលក់លៀសហាល​តាមដងផ្លូវ បណ្ដាលក្រឡាប់៤-៥ត្រឡប់ផ្ងារជើង ធ្វើឲ្យអ្នកដំណើររងរបួសជាច្រើននាក់ លើផ្លូវជាតិលេខ៦ ភូមិថ្នល់ដាច់ ឃុំសង្វើយ ស្រុកជីក្រែង ខេត្តសៀមរាប។

អ្នកឃើញហេតុការណ៍បានឲ្យដឹងថា នៅមុនពេលកើតហេតុ គេឃើញរថយន្តក្រុងរបស់ក្រុមហ៊ុន ពន្លឺអង្គរ ពាក់ស្លាកលេខភ្នំពេញ 3B-2540 ដឹកអ្នកដំណើរជាង៦០នាក់ ធ្វើដំណើរពីសៀមរាបមកភ្នំពេញ ពេលមកដល់ចំណុចខាងលើ បាន​រេចង្កូតបុកម៉ូតូ​អ្នកលក់សៀលហាល ពាក់លេខកំពង់ធំ 1C-8832 ក្នុងទិសដៅស្របគ្នា ធ្វើឲ្យរថយន្តក្រុង​ក្រឡាប់៤-៥ត្រឡប់ធ្លាក់ចូលក្នុងរណ្ដៅ បណ្ដាលឲ្យមនុស្ស៥នាក់ ស្រី២នាក់។ ចំណែកអ្នកបើកបរបានរត់គេចខ្លួនបាត់។

អ្នកឃើញហេតុការ​ណ៍​បានបញ្ជាក់ថា មូលហេតុដែលបណ្ដាលឲ្យមានគ្រោះថ្នាក់ខាងលើនេះ គឺដំបូងឡើយគេឃើញអ្នកបើកបររថយន្តក្រុងខាងលើនិយាយទូរសព្ទ ដោយមិនផ្ដោតអារម្មណ៍ក្នុងការបើកបរ ទើបបង្កគ្រោះថ្នាក់បែបនេះ។

ក្រោយកើតហេតុសមត្ថកិច្ច និងប្រជាពលរដ្ឋ​បាននាំគ្នាជួយយកអ្នករងរបួសចេញពីរថយន្ត​ រួចហៅរថយន្តសង្គ្រោះដឹកយកទៅកាន់មន្ទីរពេទ្យ៕