Post News Media ព័ត៌មានជាតិ បុកក្បាលព្រួញ...

បុកក្បាលព្រួញចែកទ្រូងផ្លូវបាក់២កង់ហើយ សមត្ថកិច្ចទៅដល់បែរម្ចាស់រថយន្តថា រថយន្តខ្លួនបែកកង់គ្មានរឿងអីទៅវិញ

ភ្នំពេញ: រថយន្តម៉ាក TOYOTA HILUX REVO មួយគ្រឿង បើកក្នុងល្បឿនលឿនរេចង្កូតទៅបុក ក្បាលព្រួញចែកទ្រូងផ្លូវ បណ្តាលឲ្យបាក់អស់២កង់ ប៉ុន្តែមិនបង្កឲ្យនរណាម្នាក់ រងរបួសនោះទេ។ បន្ទាប់ពីបុករួចសមត្ថកិច្ចបានចុះមកធ្វើការសាកសួរ បែជាម្ចាស់រថយន្តឆ្លើយប្រាប់សមត្ថកិច្ចថា គ្រាន់តែរថយន្តបែកកង់សោះមានបញ្ហាដែររឺ?។

ហេតុការណ៍នេះបានកើតឡើងកាលពីវេលាម៉ោង១២និង៣៥នាទី រំលងអាធ្រាត្រឈានចូលថ្ងៃទី១៣ ខែកុម្ភ: ឆ្នាំ២០១៧ ស្ថិតនៅទល់មុខក្លោងទ្វារផ្សារទំនើបសុវណ្ណា ស្ថិតនៅក្នុងសង្កាត់ទំនប់ទឹក ខណ្ឌចម្ការមន រាជធានីភ្នំពេញ។

យោងតាមប្រភពព័ត៌មានពីកន្លែងកើតហេតុបានឲ្យដឹងថា នៅមុនពេលកើតហេតុគេបានឃើញរថយន្តមួយគ្រឿង ម៉ាក TOYOTA HILUX REVO ពណ៌ខ្មៅ ពាក់ស្លាកលេខ ភ្នំពេញ2AF-7457 ជិះដោយបុរសម្នាក់ បើកតាមបណ្តោយផ្លូវ២៧១ ក្នុងទិសដៅពីត្បូងទៅជើង រហូតមកដល់ចំណុចកើតហេតុខាងលើ ក៏បុកជាមួយនឹងក្បាលព្រួញពុះចែកទ្រូងផ្លូវបណ្តាលឲ្យបាក់២កង់ ចំណែករថយន្តបានបែកកង់នឹងដាច់ ក្រឡេជិះទៅមុខលែងរួចផងដែរ។

ក្រោយពីកើតហេតុ សមត្ថកិច្ចជំនាញបានចុះមកធ្វើការវាស់វែងដើម្បី បញ្ជាក់ឲ្យដឹងថារថយន្តខាងលើបានបែកកង់មុនបុកទ្រូងផ្លូវរឺ ក៏បុកទ្រូងផ្លូវរួចទើបបែកកង់? បន្ទាប់មកសមត្ថកិច្ចនឹងយករថយន្តខាងលើទៅរក្សាទុកនៅ ការិយាល័យចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញដើម្បីធ្វើការដោះស្រាយទៅតាមនីតិវិធីច្បាប់៕