Post News Media ព័ត៌មានជាតិ រថយន្តដឹកឈើបំ...

រថយន្តដឹកឈើបំផ្លាញស្ពានជាលើកទី២ ខណ:ការទប់ស្កាត់បទល្មើសព្រៃឈើមិនទាន់មានប្រសិទ្ធភាព

កំពត: រថយន្តប្រភេទយីឌុប បង្កប់ឈើប្រណីត ដែលគេសង្ស័យថា ជារបស់មន្ត្រីយោធា នៅខេត្តកំពង់ស្ពឺ ហើយ នាំឈើចេញទៅវៀតណាមស្ទើររាល់ថ្ងៃនោះ បានធ្វើឲ្យបាក់ស្ពានមួយ ក្អែរឈើចេញ ហើយក៏បែកការដល់សមត្ថកិច្ច។

ហេតុការណ៍នេះបានកើតឡើងនៅវេលាម៉ោងប្រមាណ ជាង១រំលងអាធ្រាត្រ ឈានចូលថ្ងៃទី១៥ ខែកុម្ភ:នេះ នៅចំណុចស្ពាន កោះស្លា ឃុំតាកែន ស្រុកឈូក ខេត្តកំពត។

ទាក់ទងនឹងករណីរថយន្តដឹកឈើខុសច្បាប់ ដែលពលរដ្ឋថាគ្មាន ការទប់ស្កាត់ពីជំនាញនេះ យើងមិនអាចសុំការបំភ្លឺពីលោក កង គឹមលី នាយខណ្ឌរដ្ឋបាលព្រៃឈើកំពត បានទេ ដោយសារទូរសព្ទចូល តែលោកពុំទទួល។

ដោយឡែកបើតាមប្រភពពីសមត្ថកិច្ចបានឲ្យដឹងថា រថយន្តដែលដឹកឈើល្មើសច្បាប់ ដែលបណ្តាលឲ្យបាក់ស្ពានខាងលើ ម៉ាកហ៊ីយ៉ាន់ដាយ ពាក់ស្លាកលេខ ភ្នំពេញ 3B-5745 ចំណែកចំនួនឈើសរុបនៅមិនទាន់ដឹងច្បាស់នៅឡើយទេ ព្រោះជំនាញមេព្រៃហាក់ដូចមិនសូវចង់ចេញមុខ។

សមត្ថកិច្ចបញ្ជាក់ថា ក្រោយពេលជួបហេតុការណ៍បាក់ស្ពាននេះ អ្នកបើកបររថយន្តគេចខ្លួនបាត់ស្រមោល។ បច្ចុប្បន្នកម្លាំងចម្រុះ ដែលដឹកនាំដោយលោក ខាន់ សុផល ព្រះរាជអាជ្ញារងសាលាដំបូងខេត្តកំពត កំពុងសហការ ស្រាវជ្រាវស្វែងរកជនបង្កមកចាត់ការតាមច្បាប់ ។

គួររំឭកថា បើតាមការឲ្យដឹងពីប្រជាពលរដ្ឋនេះជាករណីរថយន្តដឹកឈើខុសច្បាប់បំផ្លាញស្ពានជាលើកទី២ហើយ ខណ:ដែល រថយន្តទាំងនោះ ត្រូវបានគេដឹងថា ធ្វើចរាចរណ៍ជាហូរហែរ តាមតំបន់នេះ ឈ្ពោះទៅកាន់ប្រទេសវៀតណាម តាមច្រកតន់ហន់ និងព្រែកចាក ដោយពុំបាច់ឆ្លងកាត់កុងត្រូលអ្វីឡើយ លើសពីនេះរឹតតែគ្មានការទប់ស្កាត់ពីជំនាញថែមទៀត ហើយលើកនេះ បើកុំតែជួបនឹងហេតុការណ៍បាក់ស្ពានបែបនេះ ម្ល៉េះរថយន្តនិងឈើប្រាកដជាដល់វៀតណាមបាត់ ដោយមិនបាច់រំខានដល់ជំនាញឡើយ៕