ភ្នំពេញ: កម្លាំងនគរបាលខណ្ឌពោធិ៍សែនជ័យ បានធ្វើកាស្រាវជ្រាវបង្ក្រាប និងចាប់ខ្លួនក្រុមជនជួញដូរគ្រឿងញៀនបាន២នាក់ ក្នុងនោះមានប្រុសម្នាក់ និងស្រីម្នាក់ ព្រមទាំងដកហូតបានគឿងញៀន១កញ្ចប់ធំ តម្លៃជាង៣០០ដុល្លារ ដែលស្រ្តីសង្ស័យលាក់នៅក្នុងសុដន់ និង២កញ្ចប់តូច រួមទាំងជញ្ជីងថ្លឹង និងសម្ភារៈសម្រាប់វេចខ្ចប់គ្រឿងញៀនជាច្រើនទៀត។
ប្រតិបត្តិការនោះបានធ្វើឡើង កាលពីវេលាម៉ោង២និង៤០នាទី រសៀលថ្ងៃទី២៣ ខែកុម្ភៈ ឆ្នាំ២០១៧នេះ នៅចំណុចផ្ទះជួល ស្ថិតនៅក្នុងភូមិត្រពាំងទួល សង្កាត់កំបូល ខណ្ឌពោធិ៍សែនជ័យ។
ជនសង្ស័យទាំង២នាក់នោះ ទី១-ឈ្មោះ កៅ ឡុង ភេទប្រុស អាយុ២០ឆ្នាំ ស្នាក់នៅផ្ទះជួលភូមិត្រពាំងក្រសាំង សង្កាត់ត្រពាំងក្រសាំង ខណ្ឌពោធិ៍សែនជ័យ។ ទី២-ឈ្មោះ ធុច ណាលី ភេទស្រី អាយុ២០ឆ្នាំ ស្នាក់នៅបន្ទប់ជួលគ្មានលេខ ផ្លូវលំ ភូមិត្រពាំងទួលសង្កាត់កំបូល។
ចំណែកវត្ថុតាងដកហូតបានមាន ម្សៅក្រាមពណ៍សថ្លា ១កញ្ចប់ធំ ២កញ្ចប់ល្មម ឧបករណ៍ សម្រាប់ច្រក និងប្រើប្រាស់គ្រឿងញៀនមួយចំនួនទៀត។
ក្រោយពេលឃាត់ខ្លួនជនសង្ស័យ ទាំង២នាក់ រួមនិងវត្ថុតាង ត្រូវបានកម្លាំងបញ្ចូនមកកាន់នគរបាលផ្នែកជំនាញ នៃអធិការដ្ឋាននគរបាលខណ្ឌពោធិសែនជ័យ ដើម្បីចាត់ការតាមនិតិវិធី៕
មតិយោបល់