ព័ត៌មានជាតិ

​អាមេរិក អំពាវនាវឲ្យចិនបញ្ឈប់ការសាងសង់ នៅដែនទឹកមានជម្លោះ

អាមេរិក: រដ្ឋាភិបាលក្រុងវ៉ាស៊ីនតោន ​បាន​អំពាវនាវ​ឲ្យចិន​ផ្លាស់​ប្តូរ​វិធី​ដោះ​ស្រាយ​របស់​ខ្លួន​ ចំពោះបញ្ហា​សមុទ្រ​ចិន​ខាងត្បូង​ ​ជា​ផ្លូវ​ទឹកដឹក​ជញ្ជូន​យុទ្ធសាស្រ្ត​ដ៏​សំខាន់​ ​សម្បូរ​ទៅ​ដោយ​ប្រភព​ធន​ធាន​ ​ខណ:ដែលប្រទេស​ជា​ច្រើន បាន​ទាមទារ​ចង់បានវាជារបស់ខ្លួន​។ នេះយោងតាមរយ:សារព័ត៌មាន​ CNN ចេញផ្សាយនៅថ្ងៃទី២៤ ខែកុម្ភ: ឆ្នាំ២០១៧។

អ្នកនាំ​ពាក្យ​ក្រសួង​ការបរទេស​សហរដ្ឋ​អាមេរិក លោកស្រី Anna Richey-Allen ​បាន​មាន​ប្រសាសន៍​ថា យើង​អំពាវនាវ​ដល់​ចិន​ និង​ប្រទេស​ទាម​ទារ​ផ្សេង​ទៀតកុំដោះស្រាយបញ្ហា ដោយ​​ការ​ស្ថាបនា​កន្លែង​យោធា​ថ្មី នៅលើដែនទឹកដែលកំពុងមានជម្លោះ ដែលវាអាច​ក្លាយ​ទៅ​ជា​ជម្លោះ​ខាង​យោធា ​និង​បង្កើន​ការ​ទាម​ទារ​ទឹក​ដីនៅ​ក្នុង​សមុទ្រ​ចិន​ខាង​ត្បូង ​ ហេតុដូចនេះ ប្រទេសដែលមានជម្លោះ ត្រូវ​តាំង​ចិត្ត​ដោះ​ស្រាយដោយ​សន្តិវិធី​ជាមួយគ្នា។‍

យោងតាមអ្នកវិភាគអាស៊ី បានឲ្យដឹងថា អាមេរិកធ្វើដូច្នោះ ពីព្រោះចង់ការពារប្រទេសសម្ព័ន្ធរបស់ខ្លួន ដូចជា ម៉ាឡេស៊ី វៀតណាម និងហ្វីលីពីនជាដើម។ ប្រសិនបើប្រទេសទាំងអស់នេះ បានឈ្នះក្តី ហើយទទួលបាន ការកាន់កាប់ នៅតំបន់ដែលមានជម្លោះនោះ អាមេរិកនឹងងសប្បាយចិត្ត ដោយសារខ្លួនអាចសហការ ជាមួយប្រទេសទាំងអស់នេះ ដើម្បីដាក់ក្រុមរ៉ុករករ៉ែ រួមទាំងប្រេងនៅតំបន់នោះផងដែរ។

សូមជំរាបថា សេចក្តី​ថ្លែងការណ៍​នោះ​ បានធ្វើឡើង​នៅពេល​ដែល​រដ្ឋាភិបាលក្រុងប៉េកាំង ​ជិត​បញ្ចប់​ការ​ស្ថាបនា​សាងសង់​កន្លែង​យោធា​នៅ​លើ​កោះ​សិប្បនិមិត្ត​របស់​ខ្លួន ​ក្នុង​សមុទ្រ​ចិន​ខាង​ត្បូង៕

មតិយោបល់