ភ្នំពេញ ៖ ឆ្លើយតបទៅនិងកំណើនភ្ញៀវទេសចរណ៍របស់ប្រទេសរុស្ស៊ី (RUSSY ) មានការកើនឡើងនៅលើពិភពលោក ក៏ដូចជាក្នុងតំបន់អាស៊ីអាគ្នេយ៍ រដ្ឋាភិបាលរុស្ស៊ី ព្រមទាំងវិស័យឯកជនដែលធ្វើការពាក់ព័ន្ធនិងវិស័យទេសចរណ៍នៅកម្ពុជា បានស្នើឲ្យរាជរដ្ឋាភិបាលកម្ពុជាលើកលែងទិដ្ឋាការ (VISA) ដល់ភ្ញៀវទេសចរណ៍រុស្ស៊ី ដើម្បីឲ្យពួកគេបានមកទស្សនាកម្សាន្តនៅកម្ពុជា ដូចជានៅបណ្តាប្រទេសមួយចំនួនក្នុងតំបន់។
ការស្នើសុំទិដ្ឋាការនេះ បានធ្វើឡើងនៅក្នុងកិច្ចប្រជុំមួយ រវាងវិស័យឯកជនដែលធ្វើការលើវិស័យទេសចរណ៍ជាច្រើននៅកម្ពុជា ជាមួយរដ្ឋមន្ត្រីក្រសួងទេសចរណ៍ និងមន្ត្រីជំនាញពាក់ព័ន្ធនាថ្ងៃទី០៤ខែមេសា ឆ្នាំ២០១៦ នៅទីស្តីការក្រសួងទេសចរណ៍ ។
កិច្ចប្រជុំនេះ បានពិភាក្សាដោយផ្តោតលើទីផ្សារដ៏ធំរបស់ប្រទេសរុស្ស៊ីមកកាន់តំបន់អាស៊ី ពិសេសកម្ពុជាដែលសម្បូរទៅដោយសក្ដានុពលទេសចរណ៍ និងជាទីផ្សារដ៏ល្អសម្រាប់រុស្ស៊ីនាពេលអនាគត។
ក្នុងកិច្ចប្រជុំនោះ រដ្ឋមន្ត្រីក្រសួងទេសចរណ៍ លោក ថោង ខុន បានមានប្រសាសន៍ថា “ ដើមឡើយទីផ្សារដ៏ធំ របស់រុស្ស៊ីគឺនៅប៉ែក អឺរ៉ុបប៉ុណ្ណោះទេ មានប្រទេស អេហ្សីប និង ទួរគី ជាដើមប៉ុន្តែដោយសារបញ្ហានយោបាយមិនត្រូវគ្នា រដ្ឋាភិបាលរុស្ស៊ីបានហាមឃាត់ពលរដ្ឋរបស់ខ្លួនមិនឲ្យទៅកម្សាន្តនៅប្រទេសទាំងនោះ ហើយបែរងាកមកចាប់យកប្រទេសក្នុងតំបន់អាស៊ីធ្វើ ជាគោលដៅទេសចរណ៍ ហើយកម្ពុជាក៏បានប្រឹងប្រែដើម្បីត្រង់យកលំហូរភ្ញៀវទេសចរណ៍ រុស្ស៊ី មកកាន់ប្រទេសខ្លួនផងដែរ”។
លោក រដ្ឋមន្ត្រី បានបញ្ជាក់ថា រុស្ស៊ីភាគច្រើនគេដើរលែងនៅរដូវត្រជាក់នៅប្រទេសគេ ហើយជនជាតិរុស្សី ១០០នាក់មានលិខិតឆ្លងដែន(បាស្ព័រ)ប្រមាណជា១៦នាក់ មានន័យថា ពលរដ្ឋរុស្ស៊ីជិត ១៥៦លាននាក់មានប៉ាស្ព័រកាន់តែជាង១៦ភាគរយតែប៉ុណ្ណោះ។ ដូច្នេះបានជារដ្ឋាភិបាលរុស្ស៊ី និងវិស័យឯកជនដែលរកស៊ីលើវិស័យទេសចរណ៍ មើលឃើញពីកំណើនភ្ញៀវទេសចរណ៍របស់ប្រទេសមួយនេះ ទើបស្នើសុំឲ្យរាជរដ្ឋាភិបាលលើកលែងទិដ្ឋាការ និង សម្រួលទៅលើលិខិតឆ្លងដែន ដើម្បីទាញយកភ្ញៀវទេសចរណ៍ប្រទេសនេះមកកាន់កម្ពុជាឲ្យបានច្រើន ខណ:ដែលបច្ចុប្បន្នភ្ញៀវទេសចរណ៍រុស្ស៊ីមកកាន់កម្ពុជាមានប្រមាណជាក្រោម១០ម៉ឺននាក់ ក្នុងឆ្នាំ២០១៤ ហើយប្រទេសឈនៅលេខរៀងទី១៥ បើធៀបទៅ និងបណ្តាប្រទេសដែលបានមកទស្សនាកម្សាន្តនៅក្នុងប្រទេសកម្ពុជា។
លោករដ្ឋមន្ត្រី បញ្ជាក់ទៀតថា ដោយមើលឃើញឱកាសល្អអាចត្រង់យកភ្ញៀវទេសចរណ៍មកពីប្រទេសនេះបាន ក្រសួងទេសចរណ៍សហការជាមួយផ្នែកឯកជន រៀបចំទីផ្សារត្រៀមទទួលយក ដូចគ្នានិងទីផ្សារទទួលយកភ្ញៀវទេសចរណ៍មកពីប្រទេសចិនដែលបានធ្វើក្នុងពេលកន្លងមកដែរ ដែលនៅពេលនេះយើងកំពុងសិក្សាពីទីផ្សាររុស្ស៊ីជាមុនសិនថា តើគេត្រូវការបែបណា ទាំងការហូបចុក ស្នាក់នៅ ឬចង់ទៅកម្សាន្តនៅតំបន់ណា ត្រូវរៀបកញ្ចប់ជាស្រេច ព្រោះរុស្ស៊ីគេត្រូវការកញ្ចប់ទេសចរណ៍ខុសពីភ្ញៀវអឺរ៉ុបដទៃទៀត ហើយគេក៏ចូលចិត្តសមុទ្រជាងតំបន់ ទេសចរណ៍វប្បធម៌និងធម្មជាតិដែរ។
លោក ថោង ខុន អះអាងថា “ដើម្បីទទួលទេសចរណ៍រុស្ស៊ីបាន កម្ពុជាត្រូវរៀបចំជាកញ្ចប់ទេសចរណ៍ជាមួយគេ រៀបចំបង្ហាញពីសក្ដានុពលទេសចរណ៍ សន្តិសុខ សុវត្ថិភាព បង្រៀនភាសា រដល់ផ្នែកបដិសណ្ឋារកិច្ច និងបង្ហាញពីវប្បធម៌ដ៏ល្អរបស់កម្ពុជាឲ្យគេដឹង បង្កើតជើងហោះហើរត្រង់ពីរុស្ស៊ីមកកាន់កម្ពុជា ហើយនៅខែកញ្ញាខាងមុខនេះ កម្ពុជានឹងបញ្ជូនអ្នកឯកទេស ក៏ដូចជាខាងវិស័យឯកជន សិល្ប: ទៅចូលរួមក្នុងពិព័រណ៍ដ៏ធំមួយនៅទីក្រុងមូស្គូ ដោយរៀបចំជាស្តង់ដ៏ធំបង្ហាញសមិទ្ធផលទេសចរណ៍និងទាក់ទាញចំណាប់អារម្មណ៍ពិសេសយុវជន រុស្ស៊ី ដែលជាអ្នកចាយលុយដ៏ធំជាងគេនៅលើពិភពលោក និងទេសចរណ៍ចូលនិវត្តន៍ដែលអាចស្នាក់នៅយូរមកកាន់កម្ពុជា”។
សូមបញ្ជាក់ថា ភ្ញៀវទេសចរណ៍ចេញក្រៅប្រទេសក្នុង១ឆ្នាំជាង៤១លាននាក់ នៅឆ្នាំ២០១៤ ក្នុងនោះមកអាស៊ី មានចំនួនជាង១លាននាក់ ហើយទៅលេងច្រើនជាងគេនៅប្រទេសថៃ ម៉ាឡេស៊ី សឹង្ហ បូរី ជាដើម ហើយកម្ពុជាក៏ត្រូវបានរុស្ស៊ីសម្លឹងជាទីផ្សារដ៏ល្អសម្រាប់គេនាពេលខាងមុខនេះ៕
មតិយោបល់