ភ្នំពេញ: នគរបាលអន្តោប្រវេសន៍បានរកឃើញជនបរទេសចំនួន ១៩នាក់ កំពុងតែលួចស្នាក់នៅ និងបំពេញការងារដោយខុសច្បាប់នៅក្នុងឃ្លាំងស្តុកឈើយីហោ តាំពេជ្យ នៅខណ្ឌពោធិ៍សែនជ័យ ។

ប្រតិបត្តិការនេះបានធ្វើឡើងកាលពីវេលាម៉ោង ៩ និង ៤៥នាទីព្រឹក ថ្ងៃទី ២១ ខែ មីនា ឆ្នាំ ២០១៧ នៅចំណុចឃ្លាំងស្តុកឈើយីហោ តាំពេជ្រ ផ្លូវបេតុង ភូមិត្រពាំងថ្លឹង សង្កាត់ចោមចៅ ខណ្ឌពោធិ៍សែនជ័យ ។

ភ្នាក់ងារ Post News បានឲ្យដឹងថា ក្នុងចំណោមជនអន្តោប្រវេសន៍ទាំងនោះរួមមាន ជនជាតិវៀតណាមចំនួន ១៥នាក់ និងជនជាតិថៃ ចំនួន ០៤នាក់ សរុប ១៩នាក់ ត្រូវបានកម្លាំងនគរបាលនៃនាយកដ្ឋានស៊ើបអង្កេត និងអនុវត្តន៍និតិវិធី នៃអគ្គនាយកដ្ឋានអន្តោប្រវេសន៍ក្រសួងមហាផ្ទៃ ដែលដឹកនាំដោយលោកឧត្តមសេនីយ៍ទោ អ៊ុក ហៃសីឡា សហការជាមួយ និងកម្លាំងនគរបាលការិយាល័យគ្រប់គ្រងជនបរទេសរាជធានីភ្នំពេញ ដោយមានការសម្របសម្រួលពីលោក សៀង សុខ ព្រះរាជអាជ្ញារងអមសាលាដំបូងរាជធានីភ្នំពេញ រកឃើញជនទាំងនោះកំពុងតែលួចលាក់ស្នាក់នៅនិង បំពេញការងារដោយខុសច្បាប់នៅក្នុងឃ្លាំងស្តុកឈើដ៏ធំមួយន្លែងដែលមានយីហោ តាំពេជ្រ នៅខណ្ឌពោធិ៍សែនជ័យ ។

ប្រភពដដែលបានបន្តថា លោកឧត្តមសេនីយ៍ទោ អ៊ុក ហៃសីឡា ប្រធាននាយកដ្ឋានស៊ើបអង្កេត និងអនុវត្តន៍និតិវិធីបានប្រាប់ភ្នាក់ងារឲ្យដឹងថា ដោយឆ្លងកាត់តាមការស្រាវជ្រាវរបស់កម្លាំងជំនាញនៃនាយកដ្ឋានស៊ើបអង្កេត និងអនុវត្តន៍និតិវិធីអស់រយះពេលជាច្រើនថ្ងៃកន្លងមកហើយនោះ បានសង្កេតឃើញថា ក្នុងទីតាំងឃ្លាំងស្តុកឈើដ៏ធំមួយកន្លែងដែលមានយីហោ តាំពេជ្រ នេះកំពុងតែប្រើប្រាស់កម្លាំងពលករបរទេសដោយខុសច្បាប់ជាច្រើននាក់ ។

ប្រភពដដែលបន្តទៀតថា ដោយក្នុងប្រតិបត្តិការណ៍ត្រួតពិនិត្យការស្នាក់នៅ និងបំពេញការងាររបស់ជនបរទេសនៅក្នុងទីតាំងខាងលើនេះដែរ កម្លាំងរបស់សមត្ថកិច្ចបានរកឃើញបុរសជនជាតិវៀតណាមចំនួន ១៥នាក់ ដែលសុទ្ធតែគ្មានលិខិតស្នាមអ្វីទាំងអស់ ហើយជនជាតិថៃចំនួន ០៤នាក់ដែលមានតែលិខិតឆ្លងដែន និងប្រើប្រាស់ទិដ្ឋាការប្រភេទអក្ស E តែមិនមានសៀវភៅការងារឡើយ ។

ក្រោយពីប្រតិបត្តិការត្រួតពិនិត្យការស្នាក់នៅ និងបំពេញការងាររបស់ជនបរទេសទាំងនោះ កម្លាំងនគរបាលអន្តោប្រវេសន៍បានធ្វើការឃាត់ខ្លួនបុរសជនជាតិវៀតណាមចំនួន ១៥នាក់ ដែលពុំមានឯកសារអ្វីទាំងអស់ ដើម្បីរង់ចាំធ្វើការបណ្តេញចេញ និងធ្វើការដកហូតលិខិតឆ្លងដែនរបស់ជនជាតិថៃទាំង ៤នាក់ដែលគ្មានសៀវភៅការងារ យកទៅធ្វើការផាកពិន័យទៅតាមច្បាប់ផងដែរ ។