ភ្នំពេញ: បុរសជាសន្តិសុខរបស់ក្រុមហ៊ុន PHOENIX ម្នាក់ ត្រូវបានគេប្រទះឃើញដេកស្លាប់នៅក្នុងអង្រឹងខាងមុខក្រុមហ៊ុន ឃ្យូប៊ី ខណ:ដែលជួលឲ្យមកយាមនៅទីនោះ និងបង្កឲ្យមានការភ្ញាក់ផ្អើលយ៉ាងខ្លាំង។ ហេតុការណ៍នេះបានកើតឡើងកាលពីវេលាម៉ោង៧ និង១៥នាទីព្រឹក ថ្ងៃទី២១ ខែមីនា ឆ្នាំ២០១៧ នៅខាងមុខក្រុមហ៊ុន ឃ្យូប៊ី ទីតាំងផ្ទះលេខ ៨២៧ ផ្លូវព្រះមុនីវង្ស ក្នុងសង្កាត់ផ្សារដើមថ្កូវ ខណ្ឌចម្ការមមន រាជធានីភ្នំពេញ ។

តាមប្រភពព័ត៌មានពីកន្លែងកើតហេតុបានឲ្យដឹងថា បុរសរងគ្រោះមានឈ្មោះ ថន សុខា អាយុ៥៨ឆ្នាំ មុខរបរសន្តិសុខក្រុមហ៊ុន PHOENIX ស្នាក់នៅផ្ទះលេខ ៣៧០ ផ្លូវលំ ភូមិមិត្តភាព សង្កាត់ព្រែកឯង ខណ្ឌច្បារអំពៅ។

ប្រភពដដែលបន្តថា មុនពេលកើតហេតុ កាលពីល្ងាចថ្ងៃទី ២០ ខែមីនា ម្សិលមិញ បុរសជាជនរងគ្រោះរួមជាមួយនិងសន្តិសុខម្នាក់ទៀត ត្រូវបានគេជួលឲ្យមកជួលក្រុមហ៊ុន ឃ្យូប៊ី ហើយក៏បាននាំគ្នាចងអង្រឹងដេក លុះព្រឹកឡើងបុរសជាសន្តិសុខម្នាក់ដែលយាមជាមួយគ្នាក៏បានទៅដាស់ ទើបបានដឹងថាស្លាប់ និងបង្កឲ្យមានការភ្ញាក់ផ្អើលកើតឡើងតែម្តង។

ក្រោយពេលកើតហេតុ កម្លាំងមានសម្ថកិច្ចមូលដ្ឋានក៏បានចុះមកដល់កន្លែងកើតហេតុ និងធ្វើកោសល្យវិច័យទៅលើសពបុរសជាជនរងគ្រោះ បានឃើញថា រូបគាត់បានស្លាប់បាត់បង់ជីវិតដោយសារតែគាំងបេះដូង និងប្រគល់សាកសពឲ្យក្រុមគ្រួសារយកទៅធ្វើបុណ្យទៅតាមប្រពៃណីនៅឯស្រុកកំណើត៕