ព្រះសីហនុៈ ជនសង្ស័យចំនួន ៣នាក់ ត្រូវបានកម្លាំងនគរបាលខេត្តព្រះសីហនុ ធ្វើការចាប់ខ្លួនពាក់ពន្ធ័នឹងករណីគ្រឿងញៀន ត្រង់ចំណុច២ទីតាំងផ្សេងគ្នាយកមកធ្វើការសាកសួរ។

សមត្ថកិច្ចបានឲ្យដឹងថា ជនសង្ស័យទាំង៣នាក់ខាងលើនេះ ឃាត់ខ្លួនបាននៅចំណុច២ទីតាំងផ្សេងគ្នា ក្នុងនោះ តាំងទី១ ស្ថិតនៅចំណុចភូមិ៣ សង្កាត់៣ ក្រុងព្រះសីហនុ ខេត្តព្រះសីហនុ កាលពីវេលាម៉ោង៥ល្ងាច ថ្ងៃទី២២ ខែមីនា ឆ្នាំ២០១៧ ឃាត់ខ្លួនបានជនសង្ស័យម្នាក់ឈ្មោះ ស៊ុន សុខុម ភេទស្រី អាយុ៣៥ឆ្នាំ ដកហូតបាន ថ្នាំញៀនមេតំហ្វេតាមីនចំនួន១៣កញ្ចប់តូច រួមនិងសម្ភារៈសម្រាប់ជក់គ្រឿងញៀនមួយចំនួន។

ចំណែកទីតាំងទី២ស្ថិតនៅចំណុច ភូមិ៤ ឃុំទំនប់រលក ស្រុកស្ទឹងហាវ ខេត្តព្រះសីហនុ ត្រូវសមត្ថកិច្ចចុះបង្ក្រាបកាលពីវេលាម៉ោង ៩និង៣០នាទីយប់ ថ្ងៃទី២២ ខែមីនា ឆ្នាំ២០១៧ ឃាត់ខ្លួនបានជនសង្ស័យទី១.ឈ្មោះ ចាន់ យាន ភេទប្រុស អាយុ៣៥ឆ្នាំ និងទី២ឈ្មោះ ស៊ិន ស្រីនួន ភេទស្រី អាយុ៣៨ឆ្នាំ ដកហូតបាន ថ្នាំញៀនមេតំហ្វេតាមីន ៤កញ្ចប់តូច ,ទូរសព្ទដៃ១គ្រឿង រួមនិងឧបករណ៍សម្រាប់វេចខ្ចប់ថ្នាំញៀនមួយចំនួន។

បច្ចុប្បន្នជសង្ស័យទាំង៣នាក់ខាងលើ រួមនិងវត្ថុតាង ត្រូវបានកម្លាំងជំនាញធ្វើការសាកសួរ ឃាត់ខ្លួនបណ្តោះអាសន្ន និងកសាងសំណុំរឿងបញ្ជូនទៅកាន់តុលាការចាត់ការតាមផ្លូវច្បាប់៕