ឧត្តរមានជ័យ: នាយផ្នែកចរាចរណ៍ស្រុកបន្ទាយអំពិល បានប្រាប់ Post News ថា នៅថ្ងៃទី២៥ ខែមីនា វេលាម៉ោង ០៥ និង៣០នាទី មានករណីគ្រោះថ្នាក់ចរាចរណ៍មួយ បានកើតឡើងរវាងរថយន្ត និងម៉ូតូ បើកបញ្ច្រាស់ទិសគ្នា បណ្តាលឲ្យអ្នកបើកម៉ូតូ រងរបួសធ្ងន់ ចំណែកអ្នករួមដំណើរ រងរបួសស្រាល នៅលើផ្លូវជាតិលេខ ៥៦ ស្ថិតនៅភូមិត្រពាំងអំពិល ឃុំគោកមន ស្រុកបន្ទាយអំពិល ។

អ្នកបើកបររថយន្តឈ្មោះ គូ ស៊ុទេវិន ភេទប្រុស អាយុ ៤៨ ឆ្នាំ រស់នៅភូមិតារ៉ាងបាល់ សង្កាត់កំពង់ស្វាយ ក្រុងសិរីសោភ័ណ្ឌ ខេត្តបន្ទាយមានជ័យ (បើករថយន្ត HILUX VIGO ពណ៌ទឹកមាស ពាក់ស្លាកលេខ ភ្នំពេញ 2AA-1223)។ ចំណែកអ្នកបើកបរម៉ូតូឈ្មោះ ដេវ ហាំង ភេទប្រុស អាយុ ២៦ ឆ្នាំ រស់នៅភូមិគោកព្រិច ឃុំអំពិល
ស្រុកបន្ទាយអំពិល បើកបរម៉ូតូវេវអ៉ី ពណ៌សខ្មៅ និងអ្នករួមដំណើរមានឈ្មោះ ហៀច សើយ ភេទប្រុស អាយុ ២១ ឆ្នាំ រស់នៅភូមិគោកព្រិច ឃុំអំពិល ស្រុកបន្ទាយអំពិល។

បច្ចុប្បន្នវត្ថុតាងទាំងពីរ ត្រូវបានសមត្ថកិច្ចធ្វើកំណត់ហេតុ និងបញ្ជូនយកមករក្សាទុកនៅអធិការដ្ឋាន ដើម្បីរង់ចាំ
ការដោះស្រាយ ហើយអ្នករងរបួស ត្រូវបានគេបញ្ជូនទៅកាន់មណ្ឌលសុខភាពគោកមន ៕