កណ្តាល ៖ នៅព្រឹកថ្ងៃទី៥ខែមេសាឆ្នាំ២០១៦ លោក លឹម សុគន្ធា ព្រះរាជអាជ្ញាអមសាលាដំបូងខេត្តកណ្តាល បានបញ្ជាឲ្យសមត្ថកិច្ចស្រុកស្អាង ដោះលែងអ្នកបើកបរទូកដរឲ្យមានសេរីភាពឡើងវិញ បន្ទាប់ពីសមត្ថកិច្ចស្តាប់យកចម្លើយចប់សព្វគ្រប់ពាក់ព័ន្ធករណីសោកនាដកម្មស្លាប់មនុស្ស៧នាក់ នៅចំណុចកំពង់ដររបស់ខ្លួន។ ចំណែកឯអ្នកបើកបររថយន្តសមត្ថកិច្ចបាននាំខ្លួនបញ្ជូនទៅកាន់សាលាដំបូងខេត្តកណ្តាលដើម្បីអនុវត្តតាមនីតិវិធីច្បាប់។
អ្នកបើកទូកដរដែលបានត្រូវដោះលែង ឲ្យមានសេរីភាពវិញ កាលព្រឹកថ្ងៃទី៤ មិនា ឆ្នាំ២០១៦ព្រះរាជអាជ្ញាសាលាដំបូងខេត្តកណ្តាលលោក លឹមសុគន្ធា បានបញ្ជាឲ្យសមត្ថកិច្ចធ្វើការឃាត់ខ្លួន ដើម្បីបើកការស៊ើបអង្កេត។
លោក លឹមសុគន្ធា ព្រះរាជអាជ្ញា បានថ្លែងឲ្យដឹងថា លោកបានឲ្យសមត្ថកិច្ចធ្វើការឃាត់ខ្លួនអ្នកបើកទូកដរដើម្បីធ្វើការសួរនាំពីហេតុការណ៍គ្រោះថ្នាក់ចរាចរណ៍នៅលើទូកដរបណ្តាលឲ្យមនុស្ស៧នាក់ បានបាត់បង់ជីវិត ហើយបើមិនមានការជាប់ពាក់ព័ន្ធក្នុងករណីនេះទេ គឺមិនត្រូវបានចោទប្រកាន់ និងឃុំខ្លួនឡើយ។
លោកវរ:សេនីយ៍ទោ សេង សុជាតិ អធិការនគរបាលស្រុកស្អាង បានឲ្យដឹង នៅព្រឹកថ្ងៃទី៥ មិនាថា លោក លឹមសុគន្ធា ព្រះរាជអាជ្ញា អមសាលាដំបូងខេត្តកណ្ដាល បានបញ្ជា ឲ្យដោះលែង ឈ្មោះ ស៊ិន រតនា ហៅខុង ភេទប្រុស អាយុ២៤ឆ្នាំ (អ្នកបើកទូកដរ និងដាក់កំណល់រថយន្ត)មានទីលំនៅភូមិបារ៉ែនលើ ឃុំស្វាយប្រទាល ស្រុកស្អាង ខេត្តកណ្ដាល។ចំណែកអ្នកបើកបររថយន្តឈ្មោះ សាក់ សារាក់ ភេទប្រុសអាយុ៣៣ឆ្នាំ មុខរបរជាងជួសជុលឌីណាម៉ូ មានទីលំនៅភូមិព្រែកហូសង្កាត់ព្រែកហូ ក្រុងតាខ្មៅ ត្រូវបាននាំខ្លួនបញ្ជូនទៅកាន់សាលាដំបូងខេត្តកណ្តាល ដើម្បីចាត់ការតាមនីតិវិធីច្បាប់។
លោកអធិការស្រុកស្អាង បានបញ្ជាក់ថា កាលពីយប់ថ្ងៃទី៣ មេសា ឆ្នាំ២០១៦បន្ទាប់ពីមានឧប្បត្តិហេតុ គ្រោះថ្នាក់ចរាចរណ៍រថយន្តឆ្លងដរ បណ្តាលឲ្យធ្លាក់ទឹកស្លាប់មនុស្ស៧នាក់ សមត្ថកិច្ចបានឃាត់ខ្លួនអ្នកបើកបររថយន្តបង្កឲ្យមានមនុស្ស៧នាក់ស្លាប់ ។
សូមរម្លឹកថា សោកនាដកម្មមួយគ្រួសារគួរឲ្យអាសូរ ធ្វើឲ្យមនុស្សប្រុស ស្រីចំនួន៧នាក់ក្នុងចំណោម១១នាក់ បានបាត់បង់ជីវិតដោយឧប្បត្តិហេតុគ្រោះថ្នាក់ចរាចរណ៍បើករថយន្ត ឆ្លងដរបណ្តាលឲ្យធ្លាក់ទឹកទន្លេនៅព្រលប់ថ្ងៃទី ០៣ ខែមេសា ឆ្នាំ ២០១៦ នេះនៅចំណុចលើកំពង់ដរព្រែកខ្សេវភូមិអុងប៉ាង ឃុំស្វាយប្រទាល ស្រុកស្អាង ខេត្តកណ្តាល ខណ:វិលត្រលប់មកពីឆេងម៉េងនៅឃុំខ្ពប។
លោកវរសេនីយ៍ សេង សុជាតិ អធិការនគរបាលស្រុកស្អាង បានឲ្យដឹងថា រថយន្តដែលធ្លាក់ទឹកទន្លេ គឺមានម៉ាកលុចស៊ីស RC300 មានអ្នកបើកបរ និងអ្នករួមដំណើរក្នុងរថយន្ត១១នាក់ បានចេញពីឆេងម៉េង នៅភូមិខ្ពប ហើយបំណងមកលំនៅឋានវិញនៅសង្កាត់ព្រែកសំរោង ក្រុងតាខ្មៅ តែដោយសារតែអ្នកបើកបរជាន់ហ្គ្រែរជ្រុលពេលដល់កំពង់ចម្លងព្រែកខ្សេវអុងប៉ាង ក៏រថយន្តស្ទុះធ្លាក់ចូលទឹកទន្លេលេច បណ្ដាលឱ្យមនុស្សក្នុងរថយន្ត៧នាក់ស្លាប់ មានចាស់ មានក្មេង ។
លោកអធិការ បានបញ្ជាក់ថា ជនរងគ្រោះ៧នាក់ដែលស្លាប់នោះមានក្មេង៥នាក់ និងមនុស្សចាស់២នាក់។ដោយឡែកមនុស្សចាស់ៗ៤នាក់ ក្នុងនោះមានតែកុងម្នាក់បានរួចផុតពីគ្រោះថ្នាក់។
លោកអធិការស្រុកស្អាង បានបញ្ជាក់ថា មុនកើតហេតុជនរងគ្រោះជនរងគ្រោះ១១នាក់ បានទៅសង្កត់ថ្នូរ(ឆេងម៉េង)នៅឃុំខ្ពប លុះដល់ម៉ោងជា៧យប់ថ្ងៃទី៣ មិនា ឆ្នាំ២០១៦ បានត្រឡប់មកផ្ទះវិញហើយក៏ត្រូវឆ្លងដរនៅចំណុចកំពង់ដរព្រែកខ្សេវ ពេលនោះកម្មករទូកដរបានរៀបក្តាដាក់ឲ្យរថយន្តឆ្លងស្រាប់តែរថយន្ត របស់ជនរងគ្រោះបានហោះផុតដរបណ្តាលឲ្យធ្លាក់ទឹកហើយមនុស្ស៧នាក់ ដែលនៅ ក្នុងរថយន្តថប់ ដង្ហើមស្លាប់តែម្តង។
មតិយោបល់