នេះជាលើកទីមួយ ដែលលោកគ្រូ អាចារ្យ អេ អគ្គនាយកស្ថានីយ៍វិទ្យុ ABC បានបង្ហាញខ្លួនក្នុងកម្មវិធីទូរទស្សន៍ជាមួយនឹង ពិធីករព័ត៌មានពោរពេញដោយបទពិសោធន៍របស់ PNN គឺលោក សោម ឆាយា។ ក្រៅពីផ្សាយផ្ទាល់លើកញ្ចក់ទូរទស្សន៍ ភីអិនអិន កម្មវិធីនេះក៏នឹងផ្សាយបន្តផ្ទាល់តាមរយៈវិទ្យុ ABC ដោយមានក្រុមការងារតំណាងវិទ្យុ ABC និងពិធីការិនីរបស់ PNN រួមគ្នាទទួលការហៅទូរសព្ទចូលរួមពីប្រិយមិត្ត ដើម្បីដោះស្រាយបញ្ហាផ្សេងៗកំពុងកើតមានក្នុងសង្គមផងដែរ។

អាចារ្យ អេ ជាពិធីករមួយរូប មានការគាំទ្រខ្លាំងតាមរយៈ កម្មវិធីប្រត្តិកម្មបន្ទាន់ (២៤ម៉ោង) របស់វិទ្យុ ABC និងកម្មវិធីមនុស្សធម៍ កម្មវិធីដាំដេីមកោងកាងជាច្រេីន ព្រមទាំងជួយក្មេងដែលឪពុកម្ដាយបោះបង់ចោលជាច្រេីនទៀត និងរថយន្តសង្គ្រោះបន្ទាន់សំរាប់សាច់ញាតិជនរងគ្រោះក្រីក្រ និងកម្មវធីសប្បុរសធម៍ជួយមន្ទីរពេទ្យគន្ធបុប្ផា និងកម្មវិធីជួយដល់សង្គមជាច្រេីនផងដែរ ខណៈនេះវត្តមានរបស់លោកក្នុងកម្មវិធីទូរទស្សន៍ PNN “មតិផ្ទុយ” កាន់តែច្រើនកុះករថែមទៀត។

អគ្គនាយករងស្ថានីយទូរទស្សន៍ PNN លោក សោម ឆាយា ប្រាប់ឲ្យដឹងថា “មកទល់ពេលនេះមានប្រិយមិត្តជាច្រើន បានដឹងឮពីកម្មវិធីថ្មីដែលមានវិទ្យុ ABC សហការជាមួយស្ថានីយទូរទស្សន៍ ភីអិនអិន រួចមកហើយ។ ហើយពួកគេថែមទាំងបានបញ្ចេញមតិជាវិជ្ជមាន បង្ហាញការគាំទ្រយ៉ាងខ្លាំងផងដែរ”។

ជារៀងរាល់ថ្ងៃ មានប្រិយមិត្តអ្នកស្តាប់ជាច្រើន តែងហៅទូរសព្ទចូលកម្មវិធីរបស់វិទ្យុ ABC ដោយភាគច្រើននៃពួកគេ សង្ឃឹមនឹងអាចធ្វើដូចគ្នានេះក្នុងកម្មវិធីទូរទស្សន៍។ ទស្សនិកជន ក៏ដូចជាប្រិយមិត្តអ្នកស្តាប់ ដែលចង់ហៅទូរសព្ទបញ្ចេញមតិយោបល់ផ្សេងៗក្នុងកម្មវិធីថ្មីនេះ អាចហៅចូលតាមរយៈលេខទូរសព្ទ 070 23 10 10 / 012 23 10 10 ជាទីមេត្រី។

កម្មវិធីថ្មីនេះ អាចារ្យ អេ ក៏បង្ហាញក្តីសង្ឃឹមខ្លាំងទៅលើប្រិយមិត្តអ្នកស្តាប់វិទ្យុ ABC របស់លោក នឹងងាកមកចាប់អារម្មណ៍កម្មវិធីនេះជាមិនខាន។ លោកបន្តថា ក្រុមការងារកំពុងទន្ទឹងរង់ចាំការហៅទូរសព្ទមកកាន់កម្មវិធីថ្មីនេះពីសំណាក់ទស្សនិកជន និងប្រិយមិត្តអ្នកស្តាប់ នៅសប្តាហ៍ក្រោយនេះ។

ប្រធានបទស្នូលនៃកម្មវិធី ត្រូវរំពឹងថានឹងផ្តោតសំខាន់លើបញ្ហាមួយចំនួនក្នុងសង្គម រាប់បញ្ចូលទាំង នយោបាយ និងសេដ្ឋកិច្ចជាដើម។ ជាមួយនឹងទស្សនៈផ្ទុយគ្នារវាងលោក សោម ឆាយា និងអាចារ្យ អេ ត្រូវគេជឿថា នឹងកាន់តែធ្វើឲ្យកម្មវិធីនេះ ពោរពេញដោយការពិភាក្សាវែកញែកយ៉ាងរស់រវើកជាមិនខាន។

PNN ចាប់ផ្តើមផ្សាយជាផ្លូវការចាប់តាំងពីខែកក្កដា ឆ្នាំ២០១៥ មក ខណៈមកទល់នឹងពេលនេះ ភីអិនអិន ទទួលបានការគាំទ្រយ៉ាងខ្លាំងពីសំណាក់ទូរទស្សនិកជន។ ដោយឡែក វិទ្យុ ABC ផ្សាយតាមរលកធាតុអាកាស ១០៧.៥ Mhz ចាប់ផ្ដើមផ្សាយតាំងពីឆ្នាំ ២០០៧ដោយមកទល់ពេលនេះទទួលបានការគាំទ្រពីប្រិយមិត្តអ្នកស្តាប់ជាច្រើនលាននាក់ទូទាំងប្រទេស៕