ភ្នំពេញៈ កម្លាំងនៃអធិការដ្ឋាននគរបាលខណ្ឌមានជ័យ ដែលដឹកនាំដោយលោក ម៉េង វិមានរតនា អធិការនគរបាលរងខណ្ឌ ធ្វើការសហការជាមួយនគរបាលប៉ុស្តិ៍ស្ទឹងមានជ័យ បានធ្វើប្រតិបត្តិឆ្មក់ចុះការបង្ក្រាបគ្រឿងញៀននៅក្នុផ្ទះមួយកន្លែង ដោយធ្វើការឃាត់ខ្លួនបុរសម្នាក់ និងដកហូតថ្នាំញៀនចំនួន ១៧កញ្ចប់ ដាវសាម៉ូរ៉ៃចំនួន២ និងឧបករណ៍ប្រើប្រាស់គ្រឿងញៀនមួយចំនួនទៀតផងដែរ។
ប្រតិបត្តិការចុះបង្ក្រាបគ្រឿងញៀននេះដែរ បានធ្វើឡើកាលពីវេលាម៉ោង១និង៣០នាទីរសៀល ថ្ងៃទី ១៥ ខែឧសភា ឆ្នាំ២០១៦ នៅចំនុចផ្ទះគ្មានលេខកន្លែង ក្នុងតំបន់មិនរៀបរយតាមមាត់ប្រឡាយស្ទឹងមានជ័យ ភូមិមានជ័យ១ ក្នុងសង្កាត់ស្ទឹងមានជ័យ ខណ្ឌមានជ័យ។
លោក ម៉េង វិមានរតនា អធិការងនគរបាលខណ្ឌមានជ័យបានប្រាប់ឱ្យដឹងថា បុរសជាជនសង្ស័យជួញដូរគ្រឿងញៀនរូបនោះមានឈ្មោះ សន រ៉ាវី ហៅប៉ូឡូ អាយុ២២ឆ្នាំ សិស្សវិទ្យាល័យជា ស៊ីម សាមគ្គី ស្នាក់នៅផ្ទះគ្មានលេខ ក្នុងតំបន់មិនរាបរយ ភូមិមានជ័យ១ សង្កាត់ស្ទឹងមានជ័យ ខណ្ឌមានជ័យ។
ដោយទទួលបាននូវបទបញ្ជាផ្ទាល់ពីលោក តេង ស៊ីណូ អធិការនគរបាលខណ្ឌមានជ័យ លោកក៏បានដឹកនាំកម្លាំងចុះប្រតិបត្តិការបង្ក្រាបគ្រឿងញៀននៅក្នុងមូលដ្ឋានរបស់លោកឲ្យអស់នោះ លោកបានដឹកនាំកម្លាំងចុះប្រតិបត្តិការបង្ក្រាបគ្រឿងញៀននៅក្នុងផ្ទះខាងលើ។
លោកក៏បានប្រាប់បន្តទៀតថា ក្នុងប្រតិបត្តិការចុះបង្ក្រាបករណីជួញដូរគ្រឿងញៀនជាក់ស្តែងនេះ កម្លាំងរបស់លោកបានធ្វើការដកហូតបានថ្នាំញៀនប្រភេទម្សៅក្រាមពណ៌សថ្លាចំនួន១៧កញ្ចប់តូច ដាវសាម៉ូរ៉ៃចំនួន២ដើម រួមទាំងឧបករណ៍សម្រាប់ប្រើប្រាស់គ្រឿងញៀនមួយចំនួនទៀតផងដែរ។
ក្រោយពីប្រតិបត្តិការណ៍ឆ្មក់ចុះបង្ក្រាបគ្រឿងញៀនជាក់ស្តែងនេះដែរ បុរសជាជនសង្ស័យជួញដូរ និងប្រើប្រាស់គ្រឿងញៀនខាងលើ រួមទាំងវត្ថុតាងត្រូវបានបញ្ជូនទៅធ្វើការសាកសួរនៅនគរបាលប៉ុស្តិ៍ស្ទឹងមានជ័យ និងបញ្ជូនទៅកាន់អធិការដ្ឋាននគរបាលខណ្ឌមានជ័យ ដើម្បីចាត់ការទៅតាមផ្លូវច្បាប់ជាបន្តទៅទៀត៕
មតិយោបល់