ព័ត៌មានជាតិ

បែកថ្នាំញៀន! នេន១អង្គ និងយុវជនម្នាក់ទៀត ឈ្លោះគ្នាតាមរម៉កកង់បីតាមដងផ្លូវត្រូវអ្នករត់កង់ប្រាប់សមត្ថកិច្ចឲ្យឃាត់ខ្លួន

ភ្នំពេញ: នេន១អង្គ និងយុវជនម្នាក់ទៀតត្រូវបាន អ្នកបើករម៉កកង់បីដឹកចូលទៅក្នុងវត្តសំរោងអណ្តែត និងបានរាយការណ៍សមត្ថកិច្ច ខណ:ដែលកំពុងឈ្លោះគ្នាលើរម៉កកង់បីតាមផ្លូវសាធារណ: សង្ស័យប្រើប្រាស់សារធាតុញៀន។

ហេតុការណ៍នេះបង្កភ្ញាក់ផ្អើលកាលពីរសៀលថ្ងៃទី១៨ ខែមេសា ឆ្នាំ២០១៧ នៅចំណុច មុខមន្ទីរពេទ្យរតន: លើកំណាត់ផ្លូវសហព័ន្ធរុស្ស៊ី ភូមិផ្សារទឹកថ្លា សង្កាត់ទឹកថ្លា ខណ្ឌសែនសុខ រាជធានីភ្នំពេញ។

សមត្ថកិច្ចបានឲ្យដឹងថា នេនខាងលើមានព្រះនាម អ៊ិន ទេព ព្រះជន្ម២៥ព្រះវស្សា គង់នៅវត្តត្រពាំងត្រកៀត ស្ថិតនៅភូមិត្រពាំងត្រកៀត ឃុំតំបូកខ្ពស់ ស្រុកដងទង់ ខេត្តកំពត។ ចំណែកយុវជនម្នាក់ត្រូវជាប្អូនបង្កើតរបស់នេនខាងលើឈ្មោះ អ៊ិន សេរី អាយុ២៤ឆ្នាំ ស្នាក់នៅភូមិទួលសង្កែ សង្កាត់ទួលសង្កែ ខណ្ឌឬស្សីកែវ។

សមត្ថកិច្ចបន្តថា កាលពីរសៀលមុនកើតហេតុ ទទួលបានសេចក្តីរាយការណ៍ពីអនុគណ:ខណ្ឌសែនសុខ ថាមានរម៉កកង់បីមួយគ្រឿងបានដឹកនេនមួយអង្គ និងយុវជនម្នាក់មកកាន់វត្តសំរោងអណ្តែត ព្រះតេជគុណបានសាកសួររកឯកសារ ពាក់ព័ន្ធនិងព្រះសង្ឃ ដូចជាសង្ឃដីកាឬឆាយាជាដើម ប៉ុន្តែមិនមានឯកសារអ្វីទាំងអស់ ថែមទាំងមានអាការ:ដូចមនុស្សបែកថ្នាំ ទើបសូមសមត្ថកិច្ចចុះមកជួយពិនិត្យតែម្តង។

សមត្ថកិច្ចដដែលបានបន្តថា ក្រោយធ្វើតេស្តទឹកនោមទៅលើយុវជន និងនេន ខាងលើ ឃើញមានផ្ទុកនូវសារធាតុញៀន អនុគណ:ខណ្ឌ បានផ្សឹកនេនខាងលើ និងបានប្រគល់ឲ្យសមត្ថកិច្ចយកទៅសាកសួរបន្ត។

នៅចំពោះមុខសមត្ថកិច្ច នេន អ៊ិន ទេព ប្រាប់ថា នៅរសៀលថ្ងៃទី១៥ មេសា ២០១៧ លោកបាននិមន្តមកពីខេត្តកំពតមកលេងជីដូន នៅក្នុងខណ្ឌឬស្សីកែវ ហើយនៅវេលាម៉ោងខាងលើ នេន បាននិមន្តតាមរម៉កកង់បីគោលបំណងទៅផ្សារទិញអីវ៉ាន់ ខណ:មកដល់ចំណុចកើតហេតុ ប្អូនប្រុស បានស្រែកឡូរឡាលើរ៉ម៉កកង់បីបង្កការភ្ញាក់ផ្អើលមនៅទីសាធារណ: ហើយត្រូវបានអ្នកដឹករម៉កកង់បីដឹកមកវត្តសំរោងអណ្តែតតែម្តង។

ក្រោយពេលផ្សឹករួច ជនសង្ស័យទាំង២នាក់ ត្រូវបានសមត្ថកិច្ចឃាត់ខ្លួនបណ្តោះអាសន្ននៅអធិការដ្ឋាននគរបាលខណ្ឌសែនសុខដើម្បីចាត់ការបន្តទៀត៕

មតិយោបល់