កណ្តាល: ភ្នាក់ងារPost News បានរាយការណ៍មកថា ជនសង្ស័យម្នាក់ ត្រូវបានសមត្ថកិច្ចឃាត់ខ្លួន ពាក់ពន្ធ័នឹងករណីជួញដូរដោយខុសច្បាប់នូវសារធាតុញៀនដោយខុសច្បាប់។

ការចាប់ឃាត់ខ្លួននេះបានធ្វើឡើងកាលពីវេលាម៉ោង១១ ថ្ងៃត្រង់ទី២៦ ខែមេសា ឆ្នាំ២០១៧ នៅភូមិកោះទៀវ ក ឃុំសំពៅពូន ស្រុកកោះធំ ខេត្តកណ្ដាល។

សមត្ថកិច្ចបានឲ្យដឹងថា ជនសង្ស័យមានឈ្មោះ ស៊្រាង ខឿន ភេទប្រុស អាយុ៣៥ឆ្នាំ មុខរបរ កសិករ ស្នាក់នៅភូមិកោះទៀវ ក ឃុំសំពៅពូន ស្រុកកោះធំ ខេត្តកណ្ដាល ។ ក្នុងនោះដកហូតវត្ថុតាងរួមមាន ក្រាមពណ៌សថ្លាសង្ស័យសារធាតុញៀន ម៉ាទឹកកក(Ice) ចំនួន៣ កញ្ចប់តូច និង១កញ្ចប់ធំ,ទូរសព្ទចល័តចំនួន១គ្រឿង។

ប្រភពដដែលបន្តថា ជនសង្ស័យខាងលើគឺជាមុខសញ្ញាដែលមានដីកាចាប់ខ្លួនរបស់សាលាដំបូងខេត្តកណ្ដាល ។ លុះនៅពេលវេលាកើតហេតុខាងលើ សមត្ថកិច្ចនគរបាលស្រុកកោះធំ បានទទួលព័ត៌មានពីប្រជាពលរដ្ឋថា ឈ្មោះ ស៊្រាង ខឿន បានសម្ងំលាក់ខ្លួនលក់គ្រឿងញៀននៅចំណុចកើតហេតុខាងលើ។

ក្រោយពីទទួលបានព័ត៌មានភ្លាមសមត្ថកិច្ចជំនាញ បានសហការជាមួយកម្លាំងនគរបាលប៉ុស្ដិ៍សំពៅពូន ចុះស្រាវជ្រាវរហូតដល់ចំណុចកើតហេតុខាងលើ ក៏បានឃាត់ខ្លួនមុខសញ្ញាសង្ស័យ និងដកហូតបានថ្នាំញៀនចំនួន៣កញ្ចប់តូច និង១កញ្ចប់ធំ នៅជាប់ខ្លួនជនសង្ស័យតែម្ដង។

នៅចំពោះមុខសមត្ថកិច្ច ជនសង្ស័យបានសារភាពថា ថ្នាំញៀនចំនួន៣កញ្ចប់តូច និង១កញ្ចប់ធំ ខាងលើនេះគឺពិតជារបស់ខ្លួនបានទិញយកមកទុកលក់ និងចែកចាយបន្តប្រាកដមែន។

បច្ចុប្បន្ន ជនសង្ស័យ និងវត្ថុតាងថ្នាំញៀនខាងលើ ត្រូវបានបញ្ជូនមកកាន់អធិការដ្ឋាននគរបាលស្រុកកោះធំ ដើម្បីចាត់ការបន្តតាមនីតិវិធី៕