ព្រះសីហនុ: ជនសង្ស័យ៣នាក់ ត្រូវបានកម្លាំងកងរាជអាវុធហត្ថខេត្តព្រះសីហនុ ឃាត់ខ្លួនជាប់ពាក់ព័ន្ធ ករណីរក្សាទុក និងចែកចាយនូវសារធាតុញៀនដោយខុសច្បាប់។

លោកឧត្តមសេនីយ៍ត្រី ហេង ប៊ុនទី មេបញ្ជាការ កងរាជអាវុធហត្ថខេត្តព្រះសីហនុ បានប្រាប់ភ្នាក់ងារ Post Newsឲ្យដឹងថា ការឃាត់ខ្លួនជនសង្ស័យទាំង៣នាក់នេះ គឺធ្វើឡើងជា២លើក ដោយប្រតិបត្តិការលើកទី១ គឺធ្វើឡើងនៅវេលាម៉ោង៩ និង៣០នាទីយប់់ ថ្ងៃទី២៣ ខែមេសា ឆ្នាំ២០១៧
ដោយកម្លាំងកងរាជអាវុធហត្ថក្រុងព្រះសីហនុ បានឃាត់ខ្លួនជនសង្ស័យម្នាក់ មានឈ្មោះ ឃួន ចាន់ណារិទ្ធ ភេទប្រុស អាយុ៣៤ឆ្នាំ មុខរបររត់ម៉ូតូឌុប ទីលំនៅបច្ចុប្បន្នក្រុម១៣ ភូមិ២ សង្កាត់លេខ៣ ក្រុងព្រះសីហនុ ខេត្តព្រះសីហនុ ស្ថិតនៅចំណុចក្រោយសណ្ឋាគាសុខា ស្ថិតក្នុងក្រុម១២ភូមិ៤ សង្កាត់លេខ៤ ក្រុងព្រះសីហនុ ខេត្តព្រះសីហនុ និងចាប់យកវត្ថុតាងរួមមាន:ថ្នាំញៀនប្រភេទម៉ាទឹកកក ចំនួន២កញ្ចប់,ទូរសព្ទដៃ ចំនួន២គ្រឿង, ម៉ូតូ ចំនួន១គ្រឿង និងលុយខ្មែរចំនួន១០ម៉ឺនរៀល។

បន្ទាប់ពីសាកសួរចម្លើយរួចមក ជនសង្ស័យបានឆ្លើយសារភាពថា រូបគេបានទទួលទិញថ្នាំញៀនទាំងនោះ យកមកចែកចាយបន្ត ពីបក្ខពួក រស់នៅក្រុម១៤ ភូមិ៤ សង្កាត់៤ ក្រុងព្រះសីហនុ ខេត្តព្រះសីហនុ។

ក្រោយពីទទួលបានចម្លើយសារភាព នៅវេលាម៉ោង១១យប់ ថ្ងៃខែឆ្នាំដដែល កម្លាំងកងរាជអាវុធហត្ថខេត្តព្រះសីហនុ បានស្រាវជ្រាវ រហូតឈានទៅដល់ ការឃាត់ខ្លួនបានជនសង្ស័យ២នាក់បន្ថែមទៀត រួមមានឈ្មោះដួង លីម ភេទប្រុស អាយុ២៦ឆ្នាំ មុខរបរមិនពិតប្រាកដ រស់នៅ ភូមិ៥ សង្កាត់លេខ៤ ក្រុងព្រះសីហនុ ខេត្តព្រះសីហនុ និងទី២ឈ្មោះ នួន សំអាត់ ភេទប្រុស អាយុ៣២ឆ្នាំ ជនជាតិខ្មែ មុខរបរកម្មសំណង់ ទីលំនៅបច្ចុប្បន្ន ក្រុម៤ សង្កាត់លេខ៤ ក្រុងព្រះសីហនុ ខេត្តព្រះសីហនុ និងបានចាប់យកវត្ថុតាងរួមមាន:ថ្នាំញៀនប្រភេទម៉ាទឹកកក ចំនួន៣កញ្ចប់ ដែលមានទម្ងន់់ ០.០៥ក្រាម (ថ្នាំសុទ្ធ), ថ្នាំញៀនប្រភេទយ៉ាម៉ាគ្រាប់ ចំនួន១គ្រាប់ និងទូរសព្ទដៃ ចំនួន២គ្រឿង។

បច្ចុប្បន្ន ជនសង្ស័យ និងវត្ថុតាង ត្រូវបានមន្ត្រីជំនាញកងរាជអាវុធហត្ថ បានកសាងសំណុំរឿង ដើម្បីចាត់ការបន្ត តាមនីតិវិធី៕