ភ្នំពេញ: ចោរស្រីកំពូលល្បិចពូកែខាងឆបោកម្នាក់ ក្នុងចំណោមបក្ខពួក៤នាក់ ដែលកន្លងមកតែងបានធ្វើសកម្មភាពស្ទើតែរាប់មិនអស់មកហើយនោះ ពេលនេះបានធ្វើសកម្មភាពលួងលោមដោះយកគ្រឿងអលង្ការពីនិស្សិតស្រីម្នាក់។ ប៉ុន្តែខណ:ដែលកំពុងគេចខ្លួន ត្រូវបានជនរងគ្រោះដឹងខ្លួនទាន់ក៏បានស្រែកថាចោរបង្កឲ្យមានការភ្ញាក់ផ្អើលដល់ប្រជាពលរដ្ឋនិងអ្នករត់កង់បី ចាប់បានវាយទ្រុមខ្លួន ទើបប្រគល់ឲ្យសមត្ថកិច្ចចាត់ការតាមច្បាប់។

ហេតុការណ៍នេះបានកើតឡើងកាលពីវេលាម៉ោង១១និង៣០នាទី ថ្ងៃត្រង់ ថ្ងៃទី១ ខែឧសភា ឆ្នាំ២០១៧ នៅចំណុចរបងផ្សារដំបូលខៀវ ភូមិត្រពាំងថ្លឹង សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ។

សមត្ថិកិច្ចបានឲ្យដឹងថា ជនសង្ស័យមានឈ្មោះ នឹម ស្រីអូន ហៅយ៉ា ភេទស្រី អាយុ២៩ឆ្នាំ មុខរបមិនពិតប្រាកដ ស្នាក់នៅខាងក្រោយពេទ្យលោកសង្ឃ សង្កាត់ទឹកល្អក២ ខណ្ឌទួលគោក មានស្រុកកំណើតនៅសង្កាត់ស្ទឹងមានជ័យ ខណ្ឌមានជ័យ។ ចំណែក ជនរងគ្រោះឈ្មោះ ស្រូយ ស្រីល័ក្ខ អាយុ២៥ឆ្នាំ មុខរបនិសិស្ស និងលក់ផលិតផលស្នាក់នៅផ្ទះជួលដំបូលខៀវ សង្កាត់ចោមចៅ ខណ្ឌពោធិ៍សែនជ័យ។ ត្រូវជនសង្ស័យនោះដោះយកចិញ្ចៀន១វង់,កងដៃ១ឈុត,ក្រវឹក១គូ,ខ្សែក១ខ្សែ។

ប្រភពព័ត៌មានពីជនរងគ្រោះបានរៀបរាប់ថា មុនពេលកើតហេតុ នាងបានទៅឈរលេងនៅកន្លែងកើតហេតុខាងលើ តែម្នាក់ឯងប៉ុណ្ណោះ លុះមួយសន្ទុះក្រោយមក ស្រាប់តែលេចមុខជនសង្ស័យម្នាក់នោះដើរទៅជិតនិងបានសួរនាងថាមានរើសបានកញ្ចប់មាស១ថង់អត់? ភ្លាមៗនោះនាងបានឆ្លើយថា អត់បានឃើញទេ។ ហើយជនសង្ស័យក៏បានទះស្មានាងមួយដៃ ព្រមទាំងនិយាយលួមលោមឲ្យនាងដើរចេញពីទីនោះប្រហែល១០០ម៉ែត្រ ដោះគ្រឿងអលង្ការរបស់នាងតែម្ដង លុះដោះរួចហើយចោរស្រីម្នាក់នេះក៏បានដើរចាកចេញពីជនរងគ្រោះបន្តិច ខណ:នោះទើបនាងភ្ញាក់ខ្លួននិងស្រែកឆោរឡោឡើងបង្កឲ្យមានការភ្ញាក់ផ្អើលដល់អ្នករត់ម៉ូតូឌុបនិងអ្នករត់កង់បីនាំគ្នាចាប់និងវាយម្នាក់មួយដៃមួយជើងរួចប្រគល់ឲ្យសមត្ថកិច្ចតែម្តង។

នៅចំពោះមុខសមត្ថកិច្ច ជនសង្ស័យខាងលើបានសារភាពថា រូបគេ និងបក្ខពួកបានធ្វើសកម្មភាពឆបោកជម្រុះប្រាក់នៅក្នុងរាជធានីភ្នំពេញប្រហែលជាង១០០ដង តែលើកនេះត្រូវបានប្រជាពលរដ្ឋចាប់ប្រគល់ឲ្យសមត្ថកិច្ចចំណែក៣នាក់ទៀតបានគេចខ្លួនអស់៕