ភ្នំពេញ: សមត្ថកិច្ចនគរបាលប៉ុស្ដិ៍ទំនប់ទឹក បានធ្វើការឃាត់ខ្លួនជនសង្ស័យ៣នាក់ជាមុខសញ្ញាចែកចាយថ្នាំញៀនទាំងកណ្តាលយប់ ដកហូតបានថ្នាំញៀនជិត១០កញ្ចប់។

ការឃាត់ខ្លួននេះបានធ្វើឡើងកាលពីវេលាម៉ោង១រំលងអធ្រាតឈានចូលថ្ងៃទី២ ខែឧសភា ឆ្នាំ២០១៧ ស្ថិតនៅចំណុចផ្លូវលេខ២៧១ ក្នុងសង្កាត់ទំនប់ទឹក ខណ្ឌចម្ការមន រាជធានីភ្នំពេញ។

លោក ផន អូន នាយប៉ុស្ដិ៍ទំនប់ទឹកបានប្រាប់Post News ថា មុននឹងឈានដល់ការឃាត់ខ្លួនជនសង្ស័យខាងលើគឺ សមត្ថកិច្ចជិះល្បាតតាមមូលដ្ឋាន ហើយពេលនោះសមត្ថកិច្ចជិះល្បាតមកដល់ចំណុចលេខ២៧១ក៏ប្រទះឃើញ ជនសង្ស័យ២នាក់ កំពុងដើរ ដោយមានការសង្ស័យ សមត្ថកិច្ចបានកាក់សួរនាំ តែជនសង្ស័យបានព្យាយាមរត់គេចពីសមត្ថកិច្ច រួចក៏បោះគ្រឿងញៀនប្រភេទម៉ាទឹកកក ចំនួន១កញ្ចប់តូចនៅនិងដី ស្របពេលកម្លាំងសមត្ថកិច្ច ដេញចាប់បានភ្លាមៗ។

បន្ទាប់ពីសមត្ថកិច្ចឃាត់ខ្លួនជនសង្ស័យបានហើយនោះ ក៏ធ្វើការសាកសួរ រួចបន្តឈានទៅដល់ការចាប់ខ្លួនបានជនសង្ស័យម្នាក់ទៀត នៅក្រោយសាលា វ៉ាន់ដា រកឃើញគ្រឿងញៀនដែលជនសង្ស័យនោះយកទៅលាក់ទុកនៅក្នុងទូរស័ព្ទដៃម៉ាកចិន ចំនួន៨ កញ្ចប់តូច និងម៉ូតូ ម៉ាកនិច ពណ៌ស ពាក់ស្លាកលេខ ភ្នំពេញ 1GB-6127 មួយគ្រឿងទៀត សរុបទាំងអស់គ្រឿងញៀនមានចំនួន៩កញ្ចប់។

បច្ចុប្បន្នជនសង្ស័យរួមនឹងវត្ថុតាងត្រូវបានសមត្ថកិច្ចនគរបាលប៉ុស្ដិ៍ទំនប់ទឹកធ្វើការសាកសួរនិងកសាងសណុំរឿងបញ្ជូនខ្លួនទៅកាន់អធិការដ្ឋាននគរបាលខណ្ឌចម្ការមន ដើម្បីចាក់ការបន្តតាមផ្លូវច្បាប់៕