តាកែវៈ លោកអធិការរងស្រុកត្រាំកក់ បានប្រាប់ Post News ថា​ មានករណីគ្រោះថ្នាក់ចរាចរណ៍ រថយន្តបុកម៉ូតូ បណ្តាលឲ្យយុវជនម្នាក់ស្លាប់ភ្លាមៗនៅនឹងកន្លែង និងម្នាក់ទៀតរបួសធ្ងន់។

ហេតុការណ៍នេះបានកើតឡើងកាលពីវេលាម៉ោង៨និង១០នាទីយប់ ថ្ងៃទី១ ខែឧសភា ឆ្នាំ២០១៧ នៅលើផ្លូវជាតិលេខ៣ ចន្លោះគីឡូម៉ែត្រលេខ៧៦-៧៧ ក្នុងភូមិព្រៃស្រោង ឃុំអង្គតាសោម ស្រុកត្រាំកក់ ខេត្តតាកែវ។

លោកអធិការបានបន្តថា មុនពេលកើតហេតុ គេឃើញរថយន្ត១គ្រឿងម៉ាក ស្ទីអ័រវី ពណ៌ខ្មៅ ពាក់ស្លាកលេខ ភ្នំពេញ2M-9061 អ្នកបើកបរមិនស្គាល់អត្តសញ្ញាណ បានបើកពីទិសខាងត្បូង លុះមកដល់ចំណុចកើតហេតុ បានមកបុកម៉ូតូ១គ្រឿង ក្នុងទិសដៅបញ្រ្ចាសគ្នា ម៉ាក​ហុងដា សេ១២៥ ពណ៌ខ្មៅ ស៊េរី០១៧ ពាក់ស្លាកលេខ ភ្នំពេញ1FZ-2420 មិនស្គាល់អត្តសញ្ញា សន្លប់បាត់ស្មារតី រងរបួសធ្ងន់ និងអ្នករួមដំណើរឈ្មោះ សាយ រ៉ា ភេទស្រី អាយុ២៣ឆ្នាំ ស្នាក់នៅភូមិស្បូវអណ្តែត ឃុំដំបូកខ្ពស់ ស្រុកអង្គរជ័យ ខេត្តកំពត បានស្លាប់មៅនឹងកន្លែងកើតហេតុ។ ចំណែកជនរងគ្រោះ បានដឹកទៅសង្គ្រោះនៅមន្ទីរពេទ្យបង្អែកក្រុងដូនកែវ។

ក្រោយពីកើតហេតុ សមត្ថកិច្ចបានចុះដល់កន្លែងកើតហេតុ ធ្វើការវាស់វែង និងនាំយកមធ្យោបាយទាំង២គ្រឿង មករក្សាទុកនៅអធិការដ្ឋាននគរបាលស្រុកត្រាំកក់ រង់ចាំការដោះស្រាយគ្នានាពេលក្រោយតាមនីតិវីធីច្បាប់។ ចំណែកសាកសព ត្រូវបានសមត្ថកិច្ចប្រគល់ជូនក្រុមគ្រួសារកទៅធ្វើបុណ្យតាមប្រពៃណី៕