ភ្នំពេញៈ អធិការដ្ឋាននគរបាលខណ្ឌឫស្សីកែវ ដឹកនាំដោយលោកវរសេនីយ៍ឯក ទៀង ច័ន្ទសារ អធិការខណ្ឌ បានដឹកនាំកម្លាំងសមត្ថកិច្ច ចុះបង្ក្រាបទីតាំងជួញដូរ និងចែកចាយគ្រឿងញៀនមួយកន្លែង ដោយឃាត់ខ្លួនជនសង្ស័យ៣នាក់ និងដកហូតថ្នាំញៀន៧កញ្ចប់ធំ កាលពីវេលាម៉ោង ១១និង៣០នាទីព្រឹក ថ្ងៃទី៣ ខែឧសភា ឆ្នាំ២០១៧ នៅចំណុចផ្ទះគ្មានលេខ តាមបណ្តោយផ្លូវរថភ្លើង ក្រុមទី១៣ ភូមិស្ពានខ្ពស់ សង្កាត់គីឡូម៉ែត្រលេខ៦ ខណ្ឌឫស្សីកែវ រាជធានីភ្នំពេញ។

លោក ទៀង ច័ន្ទសារ អធិការខណ្ឌ បានឲ្យដឹងថា នៅក្នុងកិច្ចប្រតិបត្តិការនេះ គឺកម្លាំងសមត្ថកិច្ចយើងបានធ្វើការស្រាវជ្រាវរហូតឈានដល់ការបើកប្រតិបត្តិការចុះបង្ក្រាបជាក់ស្តែងនៅទីតាំងខាងលើនេះ ដោយបានធ្វើការឃាត់ខ្លួនជនសង្ស័យ៣នាក់ ព្រមទាំងដកហូតម្សៅក្រាមពណ៌សថ្លា ចំនួន ៧កញ្ចប់ធំ,ថង់ប្លាស្ទឹកសម្រាប់ច្រកគ្រឿងញៀនមួយចំនួន, ដាវកែច្នៃចំនួន ១ដើម,ជញ្ជីងសម្រាប់ថ្លឹងគ្រឿងញៀនចំនួនមួយ និងឧបករណ៍ប្រើប្រាស់មួយចំនួន។

លោក ទៀង ច័ន្ទសារ បានបន្តទៀតថា ជនសង្ស័យទាំង៣នាក់ខាងលើ ទី១មានឈ្មោះ ស ចាន់ ភេទប្រុស អាយុ២៧ឆ្នាំ មុខរបរ មិនពិតប្រាកដ (ជួញដូរ) មានទីលំនៅផ្ទះជួលគ្មានលេខ ផ្លូវលំ ក្រុមទី១០ ភូមិមិត្តភាព សង្កាត់ឫស្សីកែវ,ទី២ឈ្មោះ ម៉ុន ប្រុសពៅ ភេទប្រុស អាយុ២៣ឆ្នាំ មុខរបរ កម្មករ (ប្រើប្រាស់) និងទី៣ឈ្មោះ ម៉ុន ផ្កាយព្រឹក ភេទប្រុស អាយុ១៩ឆ្នាំ មុខរបរ កម្មករ (ប្រើប្រាស់) បច្ចុប្បន្នអ្នកទាំង២នាក់ មានទីលំនៅផ្ទះគ្មានលេខ ផ្លូវរថភ្លើង ក្រុម១៣ ភូមិស្ពានខ្ពស់ សង្កាត់គីឡូម៉ែត្រលេខ៦ ខណ្ឌឫស្សីកែវ។

ក្រោយពីធ្វើការឃាត់ខ្លួនជនសង្ស័យទាំង៣នាក់ រួចនឹងវត្ថុតាង ត្រូវសមត្ថកិច្ចបញ្ជូនទៅកាន់អធិការដ្ឋាននគរបាលខណ្ឌឫស្សីកែវ ដើម្បីកសាងសំណុំរឿង បញ្ជូនទៅកាន់សាលាដំបូងរាជធានីភ្នំពេញចាត់ការតាមនិតិវិធីច្បាប់៕