ភ្នំពេញៈ ជនសង្ស័យម្នាក់ ក្រោយឆក់ទូរសព្ទមិនបានសម្រេច ហើយត្រូវប្រជាពលរដ្ឋស្វាគមន៍មួយដៃមួយជើងជិតក្ស័យ ពេលជិះម៉ូតូបុកអ្នកធ្វើដំណើរផ្សេងទៀតតាមផ្លូវ តែជនរងគ្រោះដេញតាមយកទូរសព្ទបានវិញ រួចជិះចេញទៅបាត់ដោយមិនដាក់ពាក្យបណ្តឹង។

ករណីឆក់ទូរសព្ទនេះកើតឡើងកាលពីវេលាម៉ោង៤និង២៥នាទី រសៀលថ្ងៃទី៤ ខែឧសភា ឆ្នាំ២០១៧ ស្ថិតនៅផ្លូវ៥៩៨ សង្កាត់បឹងកក់២ ខណ្ឌទួលគោក រាជធានីភ្នំពេញ។

ជនសង្ស័យមានឈ្មោះ ប៊ុន សៀងហៃ ភេទប្រុស អាយុ១៧ឆ្នាំ មុខរបរសិស្ស ថ្នាក់ទី១១អា១ នៃវិទ្យាល័យសម្តេច ហ៊ុនសែន ភ្នំពេញថ្មី និងស្នាក់នៅភូមិរោងចក្រ សង្កាត់ភ្នំពេញថ្មី ខណ្ឌសែនសុខ បានប្រាប់ថាខ្លួនមិនបានឆក់ទេ គឺអ្នកជិះម៉ូតូឌ្រីមសង់ជាអ្នកឆក់ ហើយបានបោះទូរសព្ទឲ្យមកខ្លួន ។

តាមសម្តីជនរងគ្រោះ ដែលមិនមកដាក់ពាក្យប្តឹង បានប្រាប់ឲ្យដឹងថា គាត់បានឈប់ចុចទូរសព្ទនៅលើម៉ូតូត្រង់ចំណុចលើផ្លូវ២៩១ សង្កាត់បឹងកក់២ ខណ្ឌទួលគោក ខណៈនោះស្រាប់តែមានក្រុមជនសង្ស័យចំនួន២ម៉ូតូ មានម៉ូតូម៉ាកឌ្រីមសង់ និងម៉ូតូផ្សេងទៀតមិនចាំម៉ាក បានមកធ្វើសកម្មភាពឆក់ទូរសព្ទ អាយហ្វូស៊ិចអេស ពីដៃតែម្តង។ ភ្លាមៗនោះជនរងគ្រោះបានជិះម៉ូតូដេញតាមពីខាងក្រោយ រហូតមកដល់កែងស្តុប១៩៨៦ ខាងជនសង្ស័យបានជិះម៉ូតូបុកជាមួយអ្នកធ្វើដំណើរនៅផ្លូវផ្សេងទៀត ទើបដួលធ្លាក់ជនសង្ស័យម្នាក់ ត្រូវបាននគរបាលចរាចរណ៍និងប្រជាពលរដ្ឋចាប់ស្វាគមន៍មួយដៃមួយជើង ដោយជនរងគ្រោះដែលជិះដេញតាមពីខាងក្រោយស្រែកចោរឆក់ៗ។

ក្រោយពេលចាប់បានជនសង្ស័យហើយនោះ ប្រជាពលរដ្ឋ និងសមត្ថកិច្ចបានប្រាប់ហេតុផល មិនចង់ឲ្យជនល្មើសរួចខ្លួន ពីការផ្តន្ទាទោសតាមផ្លូវច្បាប់ តែជនរងគ្រោះឆ្លើយដោយខ្លីមិនចង់ពាក់ព័ន្ធឡើយ ហើយជនរងគ្រោះម្នាក់ទៀតដែលត្រូវខាងម៉ូតូក្រុមជនសង្ស័យបុកបណ្តាលឲ្យរងខូចខាតម៉ូតូបានប្រាប់ថានេះជាថ្ងៃស៊យ ។

បច្ចុប្បន្នជនសង្ស័យត្រូវបានសមត្ថកិច្ច ឃាត់ខ្លួនបណ្តោះអាសន្ននៅអធិការដ្ឋាននគរបាលខណ្ឌទួលគោក និង សាកសួរកសាងសំណុំរឿងចាត់ការតាមនីតិវិធីច្បាប់ ៕

https://youtu.be/quyuLlrwYmU