កណ្តាលៈ គ្រោះថ្នាក់ចរាចរណ៍មួយបានកើតឡើង បន្ទាប់ពីបុរសម្នាក់ បានជិះម៉ូតូទៅបុកចំពីមុខរថយន្តឡិចស៊ីស ពេញទំហឹង បណ្តាលឲ្យស្លាប់ភ្លាមៗនៅនឹងកន្លែង។

ហេតុការណ៍នេះបានកើតឡើងកាលពីវេលាម៉ោង ៨និង២០នាទីយប់ ថ្ងៃទី៦ ខែឧសភា ឆ្នាំ២០១៧ ស្ថិតនៅចំណុច ចន្លោះគីឡូម៉ែត្រលេខ២៣-២៤ ក្នុងភូមិដីឥដ្ឋកោះផុស៣ ឃុំដីឥដ្ឋ ស្រុកកៀនស្វាយ ខេត្តកណ្តាល។

ជនរងគ្រោះដែលស្លាប់ខាងលើនេះ មានឈ្មោះ ផាត់ សុភ័ស្ភ ភេទប្រុស អាយុ២៨ឆ្នាំ ស្នាក់នៅភូមិស្តៅកន្លែង ឃុំដីឥដ្ឋ ស្រុកកៀនស្វាយ ខេត្តកណ្តាល។

យោងតាមប្រភពព័ត៌មានពីកន្លែងកើតហេតុ បានឲ្យដឹងថា មុនពេលកើតហេតុ គេបានឃើញរថយន្តម៉ាកឡិចស៊ីស RX330 ពណ៌ស ពាក់ស្លាកលេខ ភ្នំពេញ 2AM-6877 បើកបរក្នុងទិសដៅពីអ្នកលឿងទៅភ្នំពេញ លុះបានបើកមកដល់ចំណុចកើតហេតុ ត្រូវបានម៉ូតូ ម៉ាកគុបជ្រុង សេ៥០ ពណ៌សំបកឱឡឹក ពាក់ស្លាកលេខ កណ្តាល 1H-2197 បានបើកមកបុកចំពីមុខរថយន្ត ផ្នែកខាងស្ដាំដៃពេញទំហឹង បណ្តាលឲ្យអ្នកបើកម៉ូតូ ផ្លោងបោកផ្ទប់នឹងកញ្ចក់រថយន្ត ស្លាប់ភ្លាមៗនៅនឹងកន្លែង។ ចំណែកអ្នកបើកបររថយន្តវិញ បានបើកទ្វារត់គេចខ្លួនបាត់ស្រមោល។

ក្រោយពីកើតហេតុ សមត្ថកិច្ចបានចុះមកធ្វើការវាស់វែងដល់កន្លែងកើតហេតុ ដោយបាននាំយកម៉ូតូនិងរថយន្តយកទៅរក្សាទុករង់ចាំធ្វើការដោះស្រាយគ្នាពេលក្រោយតាមផ្លូវច្បាប់។ ចំណែកសាកសពជនរងគ្រោះត្រូវបានសមត្ថកិច្ចប្រគល់ទៅឲ្យក្រុមគ្រួសារធ្វើបុណ្យតាមប្រពៃណី៕