ភ្នំពេញៈ ជនសង្ស័យម្នាក់ ត្រូវបានសមត្ថកិច្ចឃាត់ខ្លួន ក្រោយពីធ្វើសកម្មភាពឆក់ខ្សែក បានសម្រេច។

ហេតុការណ៍នេះបានកើតឡើងកាលពីវេលាម៉ោង៨និង៣០នាទី យប់ថ្ងៃទី៦ ខែឧសភា ឆ្នាំ២០១៧ នៅចំណុចផ្លូវលេខ២៦១ កែងផ្លូវលេខ១១០ ក្រុម៣៤ ភូមិ៩ សង្កាត់ទឹកល្អក់ទី១ ខណ្ឌទួលគោក រាជធានីភ្នំពេញ។

សមត្ថកិច្ចបានឲ្យដឹងថា ជនសង្ស័យឈ្មោះ មៀន សុខៈ ភេទប្រុស អាយុ២២ឆ្នាំ មុខរបមិនពិតប្រាកដ ស្នាក់នៅផ្ទះលេខ២៦១ ផ្លូវ៣៧១ ភូមិទ្រា១ សង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ។ ចំណែកជនរងគ្រោះមិនស្គាល់អត្តសញ្ញាណ ភេទប្រុស អាយុប្រហែល៤២ឆ្នាំ។

ប្រភពដដែលបានបន្តថា មុនពេលកើតហេតុ ជនរងគ្រោះបានជិះរថយន្ត ម៉ាកវីហ្គោ ជាមួយមិត្តភក្រ័៤នាក់ នៅបាំងខាងក្រោយ តាមបណ្តោយផ្លូវ២៦១ ឆ្ពោះទៅផ្លូវសហពន្ធ័រុស្ស៊ី ដោយមានពាក់ខ្សែក ចេញមកខាងក្រៅអាវ ស្រាប់តែពេលនោះមានជនសង្ស័យម្នាក់ ជិះម៉ូតូម៉ាក ស៊ុយសាគី និច ពណ៌ស ពាក់ស្លាកលេខ ភ្នំពេញ1GG-0565 បានធ្វើសកម្មភាព ឆក់យកខ្សែក ពីជនរងគ្រោះដែលកំពុងពាក់នៅនឹងក ហើយកំពុងអង្គុយនៅលើរថយន្តបានសំរេច ពេលនោះជនរងគ្រោះបានស្រែកថាចោរៗ ភ្លាមនោះជនសង្ស័យក៏បានទៅបុកនឹងរថយន្តអ្នកដំណើរផ្សេងទៀត បណ្តាលឲ្យដួលហើយត្រូវប្រជាពលរដ្ឋនឹងអ្នកដំណើរ ឃាត់បាននៅផ្លូវ ២៦១កែង១១៨ រីឯជនរងគ្រោះ ក៏ចុះពីលើរថយន្តមករើសយកខ្សែកវិញ ហើយឡើងជិះរថយន្តបន្តដំណើរដោយមិនបានដាក់បណ្តឹងទេ។

ចំណែកជនសង្ស័យ ត្រូវបានប្រជាពលរដ្ឋនឹងអ្នកដំណើរឃាត់ខ្លួនប្រគល់ ឲ្យសមត្ថកិច្ចចាត់ការតាមផ្លូវច្បាប់។

បច្ចុប្បន្នជនសង្ស័យ ត្រូវបានខ្លួនជាបណ្តោះអាសន្ននៅអធិការដ្ឋានខណ្ឌទួលគោក ដើម្បីសាកសួរនឹងកសាងសំណុំរឿង បញ្ជូនទៅតុលាការចាត់ការតាមផ្លូវច្បាប់៕