ភ្នំពេញ: បុរសម្នាក់ស្រវឹងស្រា បានបើករថយន្តម៉ាកកាមរីបាឡែន មួយគ្រឿង ទៅបុកក្បាលព្រួញចែកទ្រូងផ្លូវពេញទំហឹង បណ្តាលឲ្យរថយន្តបែកកង់ខាងឆ្វេង និងដាច់ក្រឡេកង់ខាងឆ្វេងនៃផ្នែកខាងមុខ ស្ទើរទាំងស្រុងតែម្តង បង្កឲ្យមានការភ្ញាក់ផ្អើលយ៉ាងខ្លាំង។

ហេតុការណ៍នេះបានកើតឡើងកាលពីវេលាម៉ោង១២និង៤០នាទី យប់ឈានចូលថ្ងៃទី១០ ខែឧសភា ឆ្នាំ២០១៧ ស្ថិតនៅក្នុងសង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ។

ប្រភពព័ត៌មានពីកន្លែងកើតហេតុ បានឲ្យដឹងថា មុនពេលកើតហេតុគេបានឃើញបុរសម្នាក់ បើករថយន្តមួយគ្រឿងម៉ាក កាមរីបាឡែន ពណ៌ស្ករ ពាក់ស្លាកលេខ ភ្នំពេញ 2V- 3229 បើកតាមបណ្តោយផ្លូវជាតិលេខ២ ក្នុងទិសដៅពីត្បូងទៅជើង ក្នុងល្បឿនល្មម ខណ:មកដល់កន្លែងកើតហេតុ ក៏បានរ៉េចង្កូតទៅបុកក្បាលព្រួញ ចែកទ្រូងផ្លូវពេញទំហឹង បណ្តាលឲ្យរថយន្តបែកកង់ខាងឆ្វេង នឹងដាច់ក្រឡេកង់មុខផ្នែកខាងឆ្វេង ចំណែកក្បាលព្រួញចែកទ្រូងផ្លូវវិញ បានត្រូវរថយន្តខាងលើបុកឆែបបន្តិច តែសំណាងល្អដែលមិនបង្កឲ្យនរណាម្នាក់រងរបួសនោះឡើយ។

ក្រោយពេលកើតហេតុសមត្ថកិច្ចជំនាញបានចុះមកវាស់វែងយករថយន្តទៅរក្សាទុកនៅ អធិការដ្ឋាននគរបាលខណ្ឌមានជ័យ ដើម្បីដោះស្រាយនៅពេលក្រោយតាមនីតិវិធីច្បាប់៕