ភ្នំពេញៈ មានការណ៍ភ្ញាក់ផ្អើលដោយប្រទះឃើញបុរសសន្តិសុខម្នាក់ បានដេកស្លាប់ក្នុងប៉ុស្តិ៍យាម។
ហេតុការណ៍ភ្ញាក់ផ្អើលខាងលើនេះបានកើតឡើងកាលពីវេលាម៉ោង៥និង៣០នាទី ទៀបភ្លឺថ្ងៃទី១៦ ខែឧសភា ឆ្នាំ២០១៧ ស្ថិតនៅផ្លូវបេតុង ក្នុងរោងពុម្ពក្រដាសភូមិឬស្សី សង្កាត់ស្ទឹងមានជ័យ ខណ្ឌមានជ័យ។

យោងតាមសម្តីរបស់ម្នាក់ដែលត្រូវជាមិត្តភក្តិសពបុរសខាងលើបានឲ្យដឹងថា មុនពេលកើត កាលពីល្ងាចថ្ងៃទី១៥ ខែឧសភា ឆ្នាំ២០១៧
រូបគាត់និងបុរសរងគ្រោះខាងលើ បានទិញត្នោតជូរចំនួន៥លីត្រយកមកផឹកនៅកន្លែងកើតហេតុ លុះផឹកអស់ហើយក៏បានបែកគ្នា។ ចំណែកបុរសសន្តិសុខខាងលើ បានដេកនៅប៉ុស្តិ៍យាម លុះដល់ព្រឹកឡើងរូបគាត់បានមកប្តូរវេនយាមក៏ប្រទះឃើញមិត្តភក្តិរបស់ខ្លួនដេកស្លាប់បាត់បង់ជីវិតបាត់ទៅហើយ។ ហើយក៏បានរាយការណ៏ជូនសមត្ថកិច្ចមូលដ្ឋានឲ្យចុះទៅកន្លែងកើតហេតុ ក្រោយមកសមត្ថកិច្ចប៉ុស្តិ៍ស្ទឹងមានជ័យ បានរាយការណ៏បន្តទៅការិយាល័យជំនាញក្រុង ចុះមកធ្វើកោសសល្យវិច័យ ខណៈ ដែលពិនិត្យសព រួចសមត្ថកិច្ចជំនាញបានឲ្យដឹងថា សពបុរសខាងលើបានស្លាប់ដោយខ្យល់គ គាំងបេះដូង។

សពខាងលើមានឈ្មោះ រីម វណ្ណៈ ហៅយ៉ៅ អាយុ២២ឆ្នាំ ស្នាក់នៅផ្ទះជួល សង្កាត់ទួលសង្កែ ខណ្ឌឬស្សីកែវ មានស្រុកកំណើតនៅភូមិព្រៃដំឡូង ឃុំពោធិរាជ្យ ស្រុកស្វាយជ្រុំ ខេត្តស្វាយរៀង មុខរបរសន្តិសុខក្រុមហ៊ុនCSAS។ សពបុរសខាងលើ ត្រូវបានសមត្ថកិច្ចប្រគល់ឲ្យក្រុមគ្រួសារយកទៅធ្វើបុណ្យតាមប្រពៃណីនៅឯស្រុកកំណើត៕

https://youtu.be/jaH3xBX7fjQ