តាកែវៈ លោកអធិការរង ស្រុកបាទីបានប្រាប់Post Newsថា មានករណីគ្រោះថ្នាក់ចរាចរណ៍មួយ​បានកើតឡើងបន្ទាប់ពីម៉ូតូមួយគ្រឿង ជិះឌុបគ្នា៣នាក់ បានដួលខ្ទាតចូលក្រោមរថយន្តរងរបួសធ្ងន់និងស្រាល ត្រូវបានបញ្ជូនទៅសង្គ្រោះបន្ទាន់នៅមន្ទីរពេទ្យ។

ហេតុការណ៍នេះបានកើតឡើងកាលពីវេលាម៉ោង១០និង១០នាទី ថ្ងៃទី១៦ ខែឧសភា ឆ្នាំ២០១៧ ស្ថិតនៅតាមបណ្តោយផ្លូវជាតិលេខ២ ចន្លោះបង្គោលគីឡូម៉ែត្រលេខ ៣៥-៣៦ ភូមិហនុមាន ឃុំក្រាំងធ្នង់ ស្រុកបាទី ខេត្តតាកែវ។

ប្រភពព័ត៌មានបានឲ្យដឹងថា មុនពេលកើតហេតុ គេបានឃើញម៉ូតូមួយគ្រឿងម៉ាក ហុងដាសេ១២៥ ពណ៌ខ្មៅ ពាក់ស្លាកលេខភ្នំពេញ 1FF-8656 បើកបរក្នុងទិសដីពីត្បូងទៅជើង បើកបរដោយឈ្មោះ ឆឹង អន ភេទប្រុស អាយុ៣២ឆ្នាំ ស្នាក់នៅភូមិឃ្មាស ឃុំច្រេស ស្រុកជុំគិរី ខេត្តកំពត (រងរបួសធ្ងន់) ដោយមានអ្នករទមដំណើរ ជួង ធា ភេទស្រី អាយុ៣៤ឆ្នាំ រងរបួសស្រាល ជាប្រពន្ធ និងកូនឈ្មោះ ស្រីនីត អាយុ១០ឆ្នាំរងរបួសស្រាល បានដួលខ្ទាតចូលរថយន្តម៉ា គា ពណ៌ស ពាក់ស្លាកលេខ ភ្នំពេញ 1HFឥ7298 បើកបរមកពីទិសខាងជើង បណ្តាលឲ្យភាគីខាងម៉ូតូដួលរបួសធ្ងន់និងស្រាលបែបនេះតែម្តង។

ក្រោយកើតហេតុ មធ្យោបាយធ្វើដំណើរខាងលើ ត្រូវបានសមត្ថកិច្ចនាំយកទៅរក្សាទុកនៅអធិការដ្ឋាននគរបាលស្រុកបាទី ដើម្បីរង់ចាំធ្វើការដោះស្រាយគ្នាពេលក្រោយតាមផ្លូវច្បាប់៕