ភ្នំពេញៈ ក្រុមចោរ ជិះម៉ូតូមួយគ្រឿង មកពីក្រោយហើយធ្វើសកម្មភាពឆក់យកកាបូបស្ពាយពេលកំពុងជិះម៉ូតូពីរម្នាក់ម្តាយនិងកូន តែមិនបានសម្រេចបណ្តាលឲ្យកូនស្រីជាឌុប រងរបួសត្រូវបានបញ្ជូនតាមរថយន្តសាមុយទៅសង្គ្រោះនិងព្យាបាល។

ហេតុការណ៍នេះកើតឡើងកាលពីវេលាម៉ោង៩ និង៤០នាទីយប់ ថ្ងៃទី១៨ ខែឧសភា ឆ្នាំ២០១៧ត្រង់ចំណុចតាមបណ្តោយផ្លូវ១៨២ ខាងកើតប៉ុស្តិ៍នគរបាលរដ្ឋបាលទឹកល្អក់ទី៣ ប្រហែល១០០ម៉ែត្រ ស្ថិតក្នុងសង្កាត់ទឹកល្អក់ទី២ ខណ្ឌទួលគោក រាជធានីភ្នំពេញ។

ស្ត្រីជាម្ចាស់កាបូបមានឈ្មោះ តាំង អៀង ភេទស្រី អាយុ៤៥ឆ្នាំ មុខរបរជាមេផ្ទះ ស្នាក់នៅផ្ទះ៧១ ផ្លូវ២៧១ សង្កាត់ទឹកថ្លា ខណ្ឌសែនសុខ ។

បើតាមសម្តីពីស្ត្រីរងគ្រោះបានរៀបរាប់ឲ្យដឹងថា នៅមុនពេលកើតហេតុរូបគាត់ជិះម៉ូតូជាមួយកូនស្រី ម៉ាកហុងស្កុបពី ពណ៌ខៀវលាយស ពាក់ស្លាកលេខ
ភ្នំពេញ 1BD-5794 ទើបតែចេញមកពីដើរលេងនៅផ្សារអ៊ីអន ហើយបំណងជិះម៉ូតូត្រឡប់ទៅផ្ទះនៅម្តុំផ្សារហេងលី ដោយធ្វើដំណើរតាមបណ្តោយផ្លូវ១៨២ ក្នុងទិសដៅពីកើតទៅលិច លុះមកដល់ចំណុចកើតហេតុ ស្រាប់តែមានជនសង្ស័យចំនួន២នាក់ជិះម៉ូតូមួយគ្រឿង មិនចាំម៉ាក មកពីក្រោយបានធ្វើសកម្មភាពឆក់យកាបូបស្ពាយពីគាត់តែមិនបានសម្រេច បណ្តាលឲ្យកូនស្រីជាអ្នកឌុបដួលរងរបួសជើង ហើយភ្លាមនោះជនសង្ស័យបានគេចខ្លួនបាត់អស់។ ចំណែកជនរងគ្រោះដែលរងរបួស បានបញ្ជូនទៅសង្គ្រោះនិងព្យាបាលនៅគ្លីនិកឯកជនផងដែរ៕