ព័ត៌មានជាតិ

កណ្តាប់ដៃលោកស្នងការឡើងថ្មី ឃាត់ខ្លួនក្មេងទំនើងជាង២០នាក់ទៀតហើយ!

សៀមរាប: លោកឧត្តមសេនីយ៍ត្រី ហ៊ូ វ៉ាន់នី ស្នងការនគរបាលខេត្តសៀមរាបបានប្រាប់Post News មុននេះបន្តិចថា ក្មេងទំនើងចំនួន២២នាក់ក្នុងចំណោមក្មេងទំនើងចំនួន៣១នាក់ ត្រូវបានសមត្ថកិច្ចបង្ក្រាបនិងអប់រំ កាលពីថ្ងៃទី២២ ខែឧសភា ឆ្នាំ២០១៧។

លោកឧត្តមសេនីយ៍ត្រីហ៊ូ វ៉ាន់នី បានបន្តថា ក្មេងទំនើងទាំងនេះ តែងតែបង្កភាព រញ៉េរញ៉ៃនិងបង្ក អសន្តិសុខដល់ប្រជាពលរដ្ឋក្នុងក្រុងសៀមរាបទាំងមូលតែម្តង តាំងពីលោកមិនទាន់ឡើងកាន់តំណែង រហូតមកទល់ពេលនេះ ខណ:ដែលលោកទើបតែកាន់ តំណែងជាស្នងការ នគរបាល ខេត្តសៀមរាប នាពេលថ្មីៗនេះ ក៏ត្រូវកម្លាំងរបស់លោកធ្វើការស្រាវជ្រាវ បង្ក្រាបបានតែម្តងហើយសមត្ថកិច្ចនឹងបន្តការបង្ក្រាប ជាប្រចាំឲ្យដូចភ្លៀងរលឹម។ ជាក់ស្តែងពេលនេះសមត្ថកិច្ចបានធ្វើការឃាត់ខ្លួនបានក្មេងទំនើងចំនួន២២នាក់។

ក្នុងនោះដោយមានការ ឯកភាពពីលោកស្នងការនគរបាលខេត្ត ក៏ដូចជាលោកអធិការនគរបាលក្រុងសៀមរាប កម្លាំងនគរបាលផ្នែកព្រហ្មទណ្ឌក្រុង សហការជាមួយនគរបាលការិយាល័យជំនាញពាក់ពន្ធ័ បានធ្វើការអញ្ជើញអាណាព្យាបាល របស់ក្មេងទំនើងទាំងអស់ មកចូលរួមដឹងឮ និងធ្វើការអប់រំណែនាំ ក្រុមក្មេងទំនើងឲ្យយល់ដឹង អំពីច្បាប់ចរាចរណ៍ គ្រោះថ្នាក់នៃការប្រើប្រាស់គ្រឿងញៀន ការរាប់អានមិត្តមិនល្អនាំឲ្យខ្លួនជាប់ពាក់ព័ន្ធមានបញ្ហាប៉ះពាល់ដល់កិត្តិយសគ្រួសារនិងសង្គម ដោយការអប់រំនេះ ធ្វើបទបង្ហាញដោយនគរបាលជំនាញនីមួយៗ ។
បន្ទាប់ពីធ្វើការអប់រំណែនាំ រួចមក នគរបាលយើងបានអនុញ្ញាតឲ្យមានការធានាពីអាណាព្យាបាល ដើម្បីយកទៅអប់រំបន្ត ដោយឡែកក្នុងចំណោមម៉ូតូទាំងអស់ដែល គ្មានកញ្ចក់(១០គ្រឿង)គ្មានមួក និងគ្មានស្លាកលេខ(០៦គ្រឿង) នគរបាលយើង បានតម្រូវឲ្យម្ចាស់នីមួយៗ រៀបចំបំពាក់ឲ្យបានត្រឹមត្រូវតាមបច្ចេកទេសគ្រប់គ្រាន់ ទើបអនុញ្ញាត ប្រគល់ជូនយកទៅប្រើប្រាស់វិញ ។

គួររំលឹកផងដែរថា កាលពីល្ងាចថ្ងៃទី២១ ខែឧសភា ឆ្នាំ២០១៧ លោក ឧត្តមសេនីយ៍ត្រី ហ៊ូ វ៉ាន់នី ស្នងការនៃស្នងការដ្ឋាននគរបាលខេត្តសៀមរាប បានដឹកនាំបញ្ជាកម្លាំងផ្ទាល់ បង្រ្កាបនិងឃាត់ខ្លួនក្មេងទំនើងបានចំនួន៣១នាក់ ដកហូតម៉ូតូចំនួន២១គ្រឿង ជាបណ្តោះអាសន្នជាបន្តបន្ទាប់។ ក្រុមក្មេងទំនើងទាំងនេះតែងតែជួបជុំគ្នាជាក្រុមៗ នៅជាប់របងសណ្ឋាគារ សុខាសៀមរាប (តាមបណ្តោយផ្លូវ បុរីរដ្ឋបាល ខេត្តសៀមរាប)នៃបរិវេណអង្គរឃ្យុងយូ ។

ក្នុងចំណោមក្រុមក្មេងទំនើងដែលត្រូវបានឃាត់ខ្លួន នគរបាលជំនាញ បានធ្វើការតេស្តពិនិត្យ ទឹកនោម រកឃើញជនធ្លាប់ប្រើប្រាស់គ្រឿងញៀនចំនួន៩នាក់ កំពុងកសាងសំនុំរឿងទៅតុលាការ និងខ្លះទៀតសុំគោលការណ៍បញ្ជូនទៅមណ្ឌលអប់រំកែប្រែ ស្ថារនីតិសប្បទា អ្នកញៀនគ្រឿងញៀន ខេត្តសៀមរាប ដោយឡែកនៅសល់ចំនួន២២នាក់ទៀត ត្រូវបាននាំយកមកធ្វើការអប់រំណែនាំ នៅអធិការដ្ឋាននគរបាលក្រុងសៀមរាប និងដើម្បីជំរាបឲ្យអាណាព្យាបាលបានដឹងអំពីស្ថានភាពកូន ហើយសហការជាមួយសមត្ថកិច្ចយើងធ្វើការអប់រំណែនាំឲ្យក្លាយជាយុវជនល្អក្នុងសង្គមវិញផងដែរ ៕

មតិយោបល់