កណ្ដាលៈ បើតាមសមត្ថកិច្ច បានឲ្យដឹងថា នៅវេលាម៉ោង ៤ និង ៣០ នាទីរសៀលថ្ងៃទី២៧ ខែឧសភា មានករណីកុមារម្នាក់ រអិលធ្លាក់ពីលើគោយន្ត បណ្តាលឲ្យស្លាប់ នៅចំណុចភូមិជ្រោយពិសី ឃុំទឹកឃ្លាំង ស្រុកល្វាឯម ខេត្តកណ្តាល។

ជនរងគ្រោះឈ្មោះ ជា វិចិត្រ ភេទ ប្រុស អាយុ ០៨ ឆ្នាំ ទីលំនៅភូមិជ្រោយពិសី ឃុំទឹកឃ្លាំង ស្រុកល្វាឯម ខេត្តកណ្តាល។

ប្រភពពីសមត្ថកិច្ច បានឲ្យដឹងថា នៅវេលាថ្ងៃខែកើតហេតុខាងលើ ឈ្មោះ ជា វិចិត្រ បានរត់លេងក្បែរគោយន្ត ដែលឈប់ចតនៅផ្ទះរបស់ខ្លួន ហើយក៏ឡើងទៅលើលេងនៅលើរឺម៉កគោយន្ត ជាមួយឈ្មោះ ឡូញ ភារម្យ អាយុ០២ឆ្នាំ បានមួយសន្ទុះស្រាប់តែរអិលធ្លាក់ពីលើរឺម៉កគោយន្ត បោកក្បាលនិងផ្លូវថ្នល់បេតុង។ នៅពេលនោះឈ្មោះ ពេញ ភារម្យ ភេទ ប្រុស អាយុ ៣១ឆ្នាំ និងប្រជាពលរដ្ឋនៅជិតខាងផ្ទះ បានឃើញ និងទៅលើកជនរងគ្រោះមកធ្វើចលនា ដោយជនរងគ្រោះស្រែកថា៖ ឈឺពោះណាស់ ពីរបីម៉ាត់ ក៍ស្ងាត់មាត់ទៅ បានមួយសន្ទុះ ក៏ដាច់ខ្យល់ស្លាប់តែម្តង។

បញ្ជាក់៖ កុមាររងគ្រោះ មានជំងឺប្រចាំកាយ គឺដុសសាច់បំពង់ក ព្យាបាលរយៈពេលមួយឆ្នាំហើយ កម្លាំងជំនាញ និងប៉ុស្តិអាជ្ញាធរភូមិ ឃុំពេទ្យបានពិនិត្យសាកសព។

តាមការសន្និដ្ឋានកុមាររងគ្រោះ ពិតជារអិលធ្លាក់ស្លាប់ប្រាកដមែន ហើយសាកសពជនរងគ្រោះ ត្រូវបានសមត្ថកិច្ច ប្រគល់ជូនក្រុមគ្រួសារ ដើម្បីធ្វើបុណ្យតាមប្រពៃណី៕