កំពង់ធំ: លោកអធិការរងនគរបាលស្រុកកំពង់ស្វាយ ទទួលបន្ទុកសេនាធិការ បានប្រាប់Post Newsថា មានក្មេងប្រុសអាយុ២០ខែម្នាក់ បានរអិលជើងលង់ទឹកស្លាប់ ខណ:ដែលឪពុកម្តាយរវល់ធ្វើការងារភ្លេចខ្លួន។ហេតុការណ៍នេះបានកើតឡើងកាលពីវេលាម៉ោង៦និង១៥នាទីល្ងាច ថ្ងៃទី២៩ ខែឧសភា ឆ្នាំ២០១៧ ស្ថិតនៅចំណុចមាត់ស្ទឹងខាងមុខផ្ទះ ភូមិកំពង់គោក្រោម ឃុំកំពង់គោ ស្រុកកំពង់ស្វាយ ខេត្តកំពង់ធំ។

សមត្ថកិច្ចបានឲ្យដឹងថា ក្មេងរងគ្រោះខាងលើនេះ មានឈ្មោះ ទិតៀន ថេយាំង ភេទប្រុស អាយុ២០ខែ ស្នាក់ជាមួយឪពុកម្តាយក្នុងភូមិកើតហេតុខាងលើ។

តាមសមត្ថកិច្ចបានបញ្ជាក់ឲ្យដឹងថា មូលហេតុដែលបណ្តាលឲ្យក្មេងខាងលើស្លាប់ គឺមកពីចុះតាមឪពុកចុះទៅបាចទឹកទូក ចំណែកម្ដាយរវល់ធ្វើម្ហូប ទើបមិនដឹងកូនចុះតាមឪពុក ក៏រអិលធ្លាក់ទឹក
ស្ទឹងលង់ស្លាប់បែបនេះតែម្តង ហើយបច្ចុប្បន្នសពក្មេងប្រុសខាងលើ ត្រូវបានសមត្ថកិច្ចធ្វើកោសល្យវិច័យនិងកំណត់ហេតុ ប្រគល់ឲ្យក្រុមគ្រួសារ ធ្វើបុណ្យតាមប្រពៃណី៕