កណ្តាលៈ ហេតុការណ៍ភ្ញាក់ផ្អើលមួយបានកើតឡើង បន្ទាប់ពីប្តីប្រពន្ធមួយគូបានឈ្លោះប្រកែកគ្នារហូតបុរសជាប្តីទប់កំហឹងមិនបានទាញកាំបិតសាំងគីម ចាក់ប្រពន្ធមួយកាំបិត រួចចាក់ខ្លួនឯង២កាំបិតតាមក្រោយបណ្តាលឲ្យរងរបួសយ៉ាងធ្ងន់ធ្ងរ។ ហេតុការណ៍នេះកើតឡើងកាលពីវេលាម៉ោង៨និង១០នាទី ព្រឹកថ្ងៃទី៥ ខែមិថុនា ឆ្នាំ២០១៧ ស្ថិតនៅចំណុច ភូមិកំពង់ស្វាយ ឃុំកំពង់ស្វាយ ស្រុកកៀនស្វាយ ខេត្តកណ្តាល។

ជនរងគ្រោះមានឈ្មោះ លឹម សុខអេង ភេទស្រី អាយុ២២ឆ្នាំ ជនជាតិខ្មែរ មុខរបរកសិករ មានទីលំនៅភូមិព្រែកតានប់ ឃុំកំពង់ស្វាយ ស្រុកកៀនស្វាយ ខេត្តកណ្តាល។ ចំណែកជនបង្កជាប្តីមានឈ្មោះ ដន ភារិន ភេទប្រុស អាយុ២៧ឆ្នាំ ជនជាតិខ្មែរ មុខរបរកសិករ មានទីលំនៅកំណើតភូមិកំពង់ស្វាយ ឃុំកំពង់ស្វាយ ស្រុកកៀនស្វាយ ខេត្តកណ្តាល។ ដកហូតបាន កាំបិតសាំងគីមចំនួន១។


មុនពេលកើតហេតុ គេបានឃើញប្តីប្រពន្ធខាងលើ បានមានជម្លោះផ្ទៃក្នុងគ្រួសារ ហើយបាននាំគ្នាមកអង្គុយឈ្លោះប្រកែកគ្នានៅក្នុងបរិវេណសាលាបឋមសិក្សាកំពង់ស្វាយ បន្ទាប់មកជនបង្កជាប្តីបានយកកាំបិតសាំងគីមចាក់ទៅលើជនរងគ្រោះជាប្រពន្ធ១កាំបិតចំពោះ ហើយក៏បានយកកាំបិតចាក់ទៅលើខ្លួនឯងចំនួន២កាំបិតទៀត បណ្តាលឲ្យរងរបួសទាំងសង្ខាង បន្ទាប់មកក៍មានបងប្អូនសាច់ញាតិមកយកអ្នកទាំងពីរទៅព្យាបាលនៅឯមន្ទីរពេទ្យ ដោយប្រពន្ធយកទៅមន្ទីរពេទ្យជ័យជំនះ ចំណែកប្តីយកទៅមន្ទីរពេទ្យកាល់ម៉ែត្រ។

ចំពោះករណីនេះ ផ្នែកជំនាញសហការជាមួយប៉ុស្តិ៍បានចុះដល់កន្លែងកើតដើម្បីបន្តចាត់ការតាមនីតិវិធីច្បាប់ផងដែរ ។