ភ្នំពេញៈ ២នាក់ប្តីប្រពន្ធ ប្រកបរបរជួញដូថ្នាំញៀន ត្រូវបានកម្លាំងនគរបាលព្រហ្មទណ្ឌខណ្ឌសែនសុខ ឃាត់ខ្លួននិងដកហូតថ្នាំញៀន១០កូនថង់តូច ដាវសាំម៉ូរ៉ៃ១ដើម ថង់វេចខ្ចប់ និងសម្ភារៈមួយចំនួន។

ការឃាត់ខ្លួនជនសង្ស័យទាំង២ប្តីប្រពន្ធខាងលើនេះបានធ្វើឡើងនៅម៉ោង៩និង
៣០នាទី ព្រឹកថ្ងៃទី១០ ខែមិថុនា ឆ្នាំ២០១៧ នៅបន្ទប់លេខ៣១៣ ជាន់ទី៣ ក្រុម៤ភូមិសេប៉េសេ សង្កាត់ទឹកថ្លា ខណ្ឌសែនសុខ រាជធានីភ្នំពេញ។

ក្នុងប្រតិបត្តិការនេះ ដឹកនាំដោយលោកវរៈសេនីយ៍ត្រី គួក សុខហួរ អធិការរងខណ្ឌ តំណាងលោកវរសេនីយ៍ឯក ម៉ក់ ហុង អធិការនគរបាលខណ្ឌនិងលោកអនុសេនីយ៍ឯក យឹម ដាវុធ នាយផ្នែកព្រហ្មទណ្ឌខណ្ឌនិងកម្លាំងមួយចំនួនទៀតចូលរួមផង។

សមត្ថកិច្ចបានឲ្យដឹងថាជនសង្ស័យជាប្តីឈ្មោះ ហេង ប៊ុនលាង អាយុ៣៦ឆ្នាំ មុខរបរមិនពិតប្រាកដស្នាក់នៅបន្ទប់លេខ៣១៣ ជាន់ទី៣ ក្រុម៤ ភូមិសេប៉េសេ សង្កាត់ទឹកថ្លា ខណ្ឌសែនសុខ មានស្រុកកំណើតភូមិអញ្ជែងលើ ឃុំពុកឫស្សីស្រុកខ្សាច់កណ្តាល ខេត្តកណ្តាល។ ប្រពន្ធឈ្មោះ ញ៉ែម យ៉ារីណា អាយុ១៧ឆ្នាំ មុខរបរ
មិនពិតប្រាកដ ស្នាក់នៅបន្ទប់លេខ៣១៣ ជាន់ទី៣ ក្រុម៤ ភូមិសេប៉េសេ សង្កាត់ទឹកថ្លា ខណ្ឌសែនសុខ មានស្រុកកំណើតភូមិព្រៃសាលា សង្កាត់កាកាប ខណ្ឌពោធិ៍សែនជ័យ។

សមត្ថកិច្ចបានឲ្យដឹងថា មុននឹងឈានទៅឃាត់ខ្លួនបានជនសង្ស័យទាំង២នាក់ប្តីប្រពន្ធខាងលើ ខណៈដែលសមត្ថកិច្ចប្រើប្រាស់ជំនាញដើរតួរជាអ្នកប្រើប្រាស់គ្រឿងញៀនដើម្បីទៅរកទិញថ្នាំញៀនពីប្តីប្រពន្ធខាងលើក្រោយពីទិញបានថ្នាំញៀនហើយក៏ឈានទៅឃាត់ខ្លួនបាន២នាក់ប្តីប្រពន្ធដល់បន្ទប់ជួលក្នុងនោះសមត្ថកិច្ចធ្វើការឆែកឆេរបានរកឃើញថ្នាំញៀនប្រភេទក្រាមសថ្លាចំនួន២កូនថង់តូច ដាវស៊ាំម៉ូរ៉ៃ១ដើម ថង់វេចខ្ចប់គ្រឿងញៀន និងសម្ភារៈពាក់ព័ន្ធមួយចំនួនផង។

បច្ចុប្បន្នប្តីប្រពន្ធខាងលើកំពុងត្រូវបានឃាត់ខ្លួនធ្វើការសាកសួរបណ្តោះអាសន្ននៅអធិការដ្ឋាននគរបាលខណ្ឌសែនសុខ រង់ចាំកសាងសំណុំរឿងបញ្ជូនទៅតុលាការ ចាត់ការតាមផ្លូវច្បាប់