កណ្ដាលៈ កម្លាំងប៉ុស្តិ៍នគរបាលបែកចានសហការជាមួយជំនាញអធិការដ្ឋានស្រុក បានចុះបង្រ្កាបករណីជួញដូរសារធាតុញៀនខុសច្បាប់ឃាត់ខ្លួនជនសង្ស័យ២នាក់រួមជាមួយវត្ថុតាង។

ហេតុការណ៍នេះបានកើតឡើងនៅវេលាម៉ោង៨និង៨នាទីយប់ ថ្ងៃទី១១ ខែមិថុនា ឆ្នាំ២០១៧ ត្រង់ចំណុចផ្លូវលំភូមិព្រៃទន្លាប់ ឃុំបែកចាន ស្រុកអង្គស្នួល ខេត្តកណ្តាល។

ប្រភពព័ត៌មានបានឲ្យដឹងថា ជនសង្ស័យមានគ្នា២នាក់ ទី១ឈ្មោះ ខៀវ សំកុសែន ភេទប្រុស អាយុ២២
ឆ្នាំ ជនជាតិខ្មែរ មុខរបរ បញ្ចូលបទភ្លេងក្នុងទូរស័ព្ទ ទីលំនៅបច្ចុប្បន្នភូមិព្រៃទន្លាប់ ឃុំបែកចាន ស្រុកអង្គស្នួល ខេត្តកណ្តាលនិងទី២ឈ្មោះ នាង នីរ៉ាវតី ភេទស្រីអាយុ១៧ឆ្នាំ មុខ
របរសិស្ស ស្នាក់នៅសង្កាត់ទឹក​ល្អក់១​ ខណ្ឌទួលគោក រាជធានីភ្នំពេញ។

វត្ថុតាងចាប់យករួមមាន ថ្នាំញៀនប្រភេទមេតំហ្វេតាមីន (ម៉ាទឹកកក ICE )៣ដុំធំ, ១ដុំមធ្យមនិង១៣កញ្ចប់ធំ (ស្មើ២២៧ក្រាម)កាបូបដៃស្រីបត់ពណ៌ប្រផេះ១​និងពណ៌លឿង១។

ប្រភពដដែលបានបន្តថា នៅមុនពេលកើតហេតុខាងលើកម្លាំងប៉ុស្តិ៍នគរបាលបែកចានសហការជាមួយជំនាញអធិ
ការដ្ឋានស្រុក បានទទួលព័ត៌មានថាមានមុខសញ្ញាកំពុងជួញដូរសារធាតុញៀននៅចំណុចខាងលើ កម្លាំងជំនាញបានចុះទៅបង្ក្រាបឃាត់ខ្លួន២នាក់ និងដកហូតថ្នាំញៀន៣ដុំធំ, ១ដុំមធ្យមនិង១៣កញ្ចប់ធំ។

តាមចម្លើយសារភាពរបស់ជនសង្ស័យទាំង២ខាងលើបានឆ្លើយថា ខ្លួនជាអ្នកទទួលថ្នាំញៀនមកលក់បន្តទៅខេត្តព្រះសីហនុ។ ជនសង្ស័យ រួមជាមួយវត្ថុតាង ត្រូវបានបញ្ជូនមកកាន់អធិការដ្ឋាននគរបាលស្រុក ដើម្បីសាកសួរបន្ត។

ក្រោយបញ្ចប់ការសាកសួរ ជនសង្ស័យរួមជាមួយវត្ថុតាង ត្រូវបានបញ្ជូនទៅកាន់ការិយាល័យប្រឆាំងគ្រឿងញៀនខេត្ត ដើម្បីកសាងសំណុំរឿងបន្តចាត់ការតាមនីតិវិធី៕